Abasirikare bakuru bakora mu rwego rw’ubutasi bwa gisirikare muri Repubulika Iharanira Demokarasi ya Congo, barashinja Géneral-Major Makombo Mwinaminayi Jean Roger uyobora ruriya rwego icyenewabo.
Aba ba Ofisiye mu ibaruwa bandikiye abarimo Perezida Félix Antoine Tshisekedi batabaza, bavuze ko uriya Jenerali yahise aha akazi mu biro bye abarimo umuhungu we, mubyara we ndetse n’umukobwa we, nyamara nta bunararibonye bafite bwo gukorera urwego rukomeye nka ruriya.
Muri iyo baruwa, basabye Tshisekedi n’abarimo Lt. Gen Franck Ntumba ushinzwe ibikorwa bya gisirikare muri Perezidansi ya Congo kugira icyo bakora kuri kiriya kibazo mu maguru mashya.
Mu kwezi gushize ni bwo Gen Makombo yagizwe Umukuru w’Ubutasi bwa gisirikare bwa RDC, asimbuye Général-Major Christian Ndaywell wagizwe Umugaba w’Ingabo zirwanira ku butaka.
