Israel yakajije umurego mu bitero kuri Gaza nyuma y’amasaha make hatangajwe ko amasezerano yo guhagarika imirwano no kurekura imbohe hagati ya Israel na Hamas yagezweho, nk’uko abaturage ndetse n’abayobozi muri Gaza babitangaza.
Amasezerano akomeye yo guhagarika imirwano hagati ya Israel n’umutwe witwaje intwaro wa Hamas uyobora Gaza, yavuzwe kuri uyu wa Gatatu ushize nyuma y’ubwunzi bwa Qatar, Misiri na Amerika ndetse n’amezi 15 yo kumena amaraso mu butaka bukikije inyanja mu Burasirazuba bwo Hagati.
Aya masezerano avuga ihagarikwa ry’imirwano ibyumweru bitandatu mbere y’uko ingabo za Israel zagiye muri Gaza , ahapfiriye ibihumbi mirongo, zihava buhoro buhoro. Imbohe zajyanwe na Hamas zari kurekurwa nk’ingurane y’imfungwa z’Abanyapalestine zafunzwe na Israel.
Umwe mu bayobozi ba Israel yavuze ko kwemera aya masezerano bitazamezwa ku mugaragaro kugeza igihe byemejwe n’inama y’umutekano na guverinoma, kandi amatora yari ateganijwe kuri uyu wa Kane biravugwa ko yasunitswe.
Icyakora, Minisitiri w’Intebe wa Israel, Benjamin Netanyahu, yashinje Hamas kuba hari ibyo yasabye ku munota wa nyuma kandi ikisubira ku masezerano.
Ibiro bya Netanyahu byagize biti: “Inama y’Abaminisitiri ya Israel ntizaterana kugeza igihe abunzi bazamenyesha Israel ko Hamas yemeye ingingo zose z’amasezerano”.
Ku ruhande rwayo, Hamas ivuga ko yiyemeje kubahiriza amasezerano yo guhagarika imirwano yatangajwe n’abunzi ku wa Gatatu nk’uko byatangajwe n’umuyobozi mukuru w’uyu mutwe, Izzat el-Reshiq kuri uyu wa Kane.
