Leta Zunze Ubumwe za Amerika zafatiye ibihano Umuyobozi w’umusirikare w’igihugu cya Sudani nyuma yo kumushinja guhitamo intambara aho guhitamo imishyikirano no gukuraho amakimbirane. Ibihano bije nyuma y’icyumweru kimwe Washington ifashe ingamba nk’izo ku muyobozi w’inyeshyamba za Rapid Support Forces muri Sudani.
Kuri uyu wa Kane, itariki 16 Mutarama 2025, nibwo Leta Zunze Ubumwe za Amerika zatangaje ibihano ku muyobozi w’Ingabo za Sudani, Abdel Fattah al-Burhan nk’uko tubikesha urubuga rwa Deutsche Welle.
Umuyobozi w’ingabo za Sudani yashinjwaga guhagarika imfashanyo z’ubutabazi no gutera amashuri, amasoko, n’ibitaro mu ntambara yateje ikibazo kinini cyo kuvana abantu mu byabo ku Isi.
Minisiteri y’imari ya Leta Zunze Ubumwe za Amerika mu itangazo ryayo yagize ati: “Burhan” yanze kwitabira ibiganiro mpuzamahanga by’amahoro kugira ngo imirwano irangire, ahitamo intambara aho guhitamo imishyikirano itarimo uburyarya no kugabanya amakimbirane. ”
Minisiteri y’ububanyi n’amahanga yise ibihano bya Amerika kutagira umutima
Mu gusubiza, Minisiteri y’ububanyi n’amahanga y’igihugu cya Sudani yavuze ko ibyo bihano ari “ukutagira umutima,” yongeraho ko “bidafite ishingiro ry’ibanze ry’ubutabera no gukorera mu mucyo.”
Minisiteri kandi mu itangazo ryayo yavuze ko Burhan “yarindaga abaturage ba Sudani umugambi wa jenoside.”
