Umuhanzi uri mu bakunzwe muri Tanzania, Harmonize yerekanye umukunzi we mushya witwa Abigael Chams, atanga gasopo ku itangazamakuru n’abakoresha imbuga nkoranyambaga kutazamuvugira umukunzi nabi.
Ni ibyo yashimangiye akoresheje amashusho yasangije abamukurikira ku mbuga nkoranyamabaga, yatemberanye na Abigael Chams basangira ndetse uyu mukobwa anamutamika.
Uyu muhanzi usanzwe uzwiho gukundana n’abakobwa babyibushye, kuri ubu yahinduye amahitamo k uko Chams ari muto ari na cyo cyatumye asaba abafana be n’abakora mu itangazamakuru ry’imyidagaduro, kwirinda kuvuga amagambo mabi ku rukundo rwabo.
Ni amashusho yakurikije amagambo agira ati: “Sinshaka kumva izina ryanjye cyangwa se iry’umugore wanjye rivugwa nabi.
Mwebwe mwese abafite imbuga zo kuri interineti munyuzaho amakuru, ibitangazamakuru, ndabasabye ntimuzakoreshe izina ry’umukunzi wanjye mu buryo budashimishije. Njyewe ngira amarangamutima, ariko umukunzi wanjye we agira amarangamutima menshi cyane. Ndamukunda.”
Harmonize yanasangije abamukurikira amashusho amugaragaraza n’umukunzi we bari mu modoka nziza, yerekana niyo afunguye telefoni ye haza ifoto y’uwo mukunzi we, anatangaza ko nta narimwe azongera gusubira ku bo bakundanyeho (aba X).
Harmonize agaragaje Abigael Chams nk’umukunzi we mushya nyuma y’uko hari n’abandi yakundanye na bo kandi bazwi cyane mu myidagaduro yo muri Tanzania, barimo Fridah Kajala na Poshy Queen.
Hamornize ukunze kwitwa Konde Boy, yahamije ko afitanye umubano wihariye na Abigael Chams, kandi atifuza ko wangirika, ibyo yita ko ari amahirwe gukundwa n’uyu mukobwa.
Uretse kuba uyu muhanzi yahamije iby’umubano wabo, amakuru avuga ko Abigael na we mu minsi ishize yanditse ubutumwa ku rubuga rwe rwa Instagram, agaragaza ko yabonye umukunzi.
Yanditse agira ati: “Ntekereza ko nabonye umugabo numva unkurura rwose. Ubu rero niba ngomba kwimukira mu Mujyi wa Dar es Salaam, cyangwa se bikaba bya bindi byo gukundana muri kure (long distance) simbizi.”
