Minisitiri w’Ububanyi n’Amahanga n’Ubutwererane, Ambasaderi Olivier Nduhungirehe, yahinyuje Guverinoma ya Repubulika Iharanira Demokarasi ya Congo iherutse gutangaza ko u Rwanda rwishyize mu kato ka dipolomasi mu myaka itatu ishize.
Yasubizaga Minisitiri w’Ububanyi n’Amahanga wa RDC, Thérèse Kayikwamba Wagner, wabwiye abanyamakuru tariki ya 9 Mutarama 2025 ko impamvu ruri mu kato ari uko ibihugu by’inshuti zarwo birimo u Bwongereza na Leta Zunze Ubumwe za Amerika byarushinje uruhare mu ntambara iiri kubera mu ntara ya Kivu y’Amajyaruguru.
Minisitiri Nduhungirehe yatangaje ko kuvuga ko u Rwanda rwishyize mu kato bidafite ishingiro, cyane ko rukomeje kwakira ibikorwa mpuzamahanga, birimo Inteko Rusange y’ishyirahamwe ry’umukino wo gusiganwa n’imodoka (FIA).
Yagize ati “Kuvuga ko u Rwanda rwishyize mu kato nta shingiro bifite. Twakwishyira mu kato dute kandi twarateguye Inteko Rusange ya FIA yabereye bwa mbere muri Afurika? Twakwishyira mu kato dute se mu gihe muri uyu mwaka hano mu Rwanda tuzakira shampiyona y’Isi yo gusiganwa ku magare izaba ibereye bwa mbere muri Afurika?”
Minisitiri Nduhungirehe yasobanuye ko muri uyu mwaka, u Rwanda ruzakira inama y’abaminisitiri bo mu muryango w’ibihugu bikoresha ururimi rw’Igifaransa (La Francophonie) birimo na RDC.
Yagaragaje ko mu gihe umubano uhagaze nabi hagati y’ibihugu byombi kuva mu 2022, RDC ikomeje kwifashisha uburyo bw’itumanaho ryibasira u Rwanda, budafite ikimenyetso na kimwe rishingiraho, igamije inyungu zayo bwite.
Ati “Ibi birasanzwe. Buri gihugu gikurikira inyungu zacyo. Baradushinja, natwe tukabashinja. Rero ibyo ntibivuze ko kimwe muri ibi bihugu cyishyize mu kato. Nta shingiro bifite.”
Tariki ya 15 Ukuboza 2024, byari biteganyijwe ko Perezida Paul Kagame na Félix Tshisekedi wa RDC bahurira i Luanda muri Angola, kugira ngo basinye amasezerano yashoboraga gufasha akarere k’ibiyaga bigari kubona amahoro n’umutekano birambye.
Minisitiri Nduhungirehe yatangaje ko kugira ngo aya masezerano agerweho, hari hakenewe ibisubizo bitatu: kurandura umutwe w’iterabwoba wa FDLR, gukuraho ingamba z’ubwirinzi u Rwanda rwashyize ku mupaka n’ibiganiro hagati ya Leta ya RDC n’umutwe wa M23.
Yahamije ko u Rwanda, RDC na Angola (umuhuza) byemeranyije ku bisubizo bibiri bya mbere, ariko bigeze ku cyo kuganira na M23, Leta ya RDC irabyanga, ari na byo byabaye intandaro y’icyemezo cy’intumwa z’ibi bihugu ku rwego rw’abaminisitiri cyo gusubika isinywa ry’amasezerano.
Minisitiri Nduhungirehe yagaragaje ko ingabo za RDC zikomeje gukorana n’umutwe wa FDLR, ingabo z’u Burundi, imitwe ya Wazalendo, abacancuro b’Abanyaburayi n’ingabo zo mu muryango wa Afurika y’amajyepfo, nyamara bizi neza ko Tshisekedi afite umugambi wo gukuraho ubutegetsi bw’u Rwanda; cyane ko yabyivugiye ku mugaragaro.
Kugira ngo ikibazo cyo mu burasirazuba bwa RDC n’akarere muri rusange gikemuke, nk’uko Minisitiri Nduhungirehe yabisobanuye, umutwe wa FDLR ugomba gusenywa, u Rwanda rugakuraho ingamba z’ubwirinzi rwashyizeho, hakabaho ibiganiro hagati ya Leta ya RDC n’umutwe wa M23 kuko ari byo byakemura impamvu muzi z’aya makimbirane.
