Umunyamakuru Fatakumavuta ufungiwe muri gereza ya Mageragere yatangaje ko amaze igihe yarihindutse mu buzima bwe nyuma yo kwakira Yesu Kristo nk’Umwami n’Umukiza akanabatizwe mu mazi menshi mu Ukuboza 2024 mu itorero ry’Abadivantiste b’Umunsi wa Karindwi.
Mu kiganiro yagiranye n’abanyamakuru b’Isibo Radio bamusuye, Fatakumavuta yavuze ko ubu ari umuntu mushya kandi abayeho neza aho afungiwe.
Fatakumavuta yatangaje ko yamaze gushyira ku ruhande umuziki n’imyidagaduro muri rusange, avuga ko ashobora no kubihagarika burundu.
Uretse impinduka zo mu buryo bw’umwuka, Fatakumavuta akomeje ibikorwa by’umupira w’amaguru, akaba atoza ikipe y’abanyamakuru bakina muri gereza ya Mageragere. Iyi kipe avuga ko ari imwe mu zihatana cyane muri gereza.
Kuri ubu ashimangira ko gushyira umutima ku mupira w’amaguru biri mu bimufasha gukomeza kubaho neza no gutanga umusanzu aho ari.
Fatakumavuta yagaragaje ko asurwa kenshi n’abavandimwe, inshuti, n’abandi bantu benshi, bikamufasha kwiyumva nk’utari wenyine mu rugendo rwo kugororwa. Yongeyeho ko aho ari muri gereza abayeho neza mu buryo bwose.
