Amatsinda abiri ya Polisi y’u Rwanda ategerejwe mu marushwa y’abapolisi kabuhariwe mu bikorwa byo guhangana n’iterabwoba hifashishijwe intwaro na tekiniki i Dubai muri Leta Zunze Ubumwe z’Abarabu (UAE SWAT Challenge) y’uyu mwaka wa 2025.
Ni amarushanwa yatangajwe na Komite iyategura ya Polisi ya Dubai muri Leta Zunze Ubumwe z’Abarabu (UAE) ateganyijwe guhera mu ntangiriro z’ukwezi gutaha.
Iyo komite yanahamije ko ikipe y’u Rwanda yabaye iya mbere mu mwitozo wo kunyura mu nzitane mu marushanwa y’umwaka ushize wa 2024, na iri mu zizongera kwitabira.
Iyo kipe y’u Rwanda yegukanye umwanya wa mbere mu kunyura mu nzira y’inzitane n’amanota 52, ikurikirwa n’ikipe yo muri Kyrgyzstan yitwa Kalkan yagize amanota 51, mu gihe iyabaye iya gatatu yabaye iyo muri Uzbekistan yagize amanota 50.
U Rwanda ruzitabira mu bihugu 10 by’Afurika byemejwe kwitabira ku wa 1 Gashyantare 2025, muro ayo marushanwa azabera mu gace katunganyirijwe imyitozo yihariye gaherereye ahitwa Al Ruwayyah mu Mujyi wa Dubai.
Uretse amakipe abiri y’u Rwanda, aya marushanwa azanitabirwa n’andi makipe abiri yo muri Afurika y’Epfo, atatu yo muri Kenya, abiri yo muri Nigeria ndetse n’imwe yo muri Guyana.
Muri rusange, biteganywa ko abazitabira muri uyu mwaka, amakipe arenga 100 aturutse mu bihugu bisaga 70 bakazakurikirwa imbonankubone n’abantu barenga 5.000, mu gihe abantu basaga miliyoni 256.4 bitezweho kubikurikirana mu bitangazamakuru no ku mbuga nkoranyambaga.
Amatsinda yiteguye kwitabira ayo marushanwa yashimangiye ko yiteguye guhatana muri uyu mwaka, ndetse anagaragaza ko amaze igihe kinini yitegura.
Mu myiteguro ayo matsinda yakoze harimo imyitozo ngororamubiri, imyitozo njyarugamba, gutoranya abapolisi bahize abandi muri iyo myitozo nyuma y’igenzura ryakozwe, ndetse n’imyitozo yo ku kibuga n’ibindi.
Aya marushanwa ategurwa na Polisi ya Dubai abonwa nk’amahirwe yo kugaragaza ubushobozi bwa Polisi z’ibihugu mu ruhando mpuzamahanga.
Mu byo barushanwamo harimo ubuhanga mu gutegura ibikorwa, kumashana intego no gukorera hamwe, ababaye indashyikirwa bakaba bashimirwa ndetse bakaba n’intangarugero ku bandi.
Ni amarushanwa akorwa mu byiciro bitanu bigamije kugaragaza ukwihangana n’umurava by’abitabiriye ayo marushanwa kandi bikagaragaza isura y’ubudashyikirwa bw’igihugu bahagarariye mu bikorwa bya Polisi.
Nanone kandi ayo marushanwa afatwa nk’amahirwe yo guhuza impuguke mu gucunga umutekano ku Isi, bagasangira ingamba, ubunararibonye ndetse n’ubumenyi cyangwa ibikoresho by’ikoranabuhanga bigezweho mu gucunga umutekano.
Aya marushanwa yatangiye mu mwaka wa 2019, akomoka ku yandi mpuzamahanga yatangiye mu mwaka wa 2004 yiswe ‘Original SWAT World Challenge’ akaba abera ahitwa Little Rock muri Leta ya Arkansas ya Leta Zunze Ubumwe z’Amerika.
