Perezida Félix Antoine Tshisekedi Tshilombo wa Repubulika Iharanira Demokarasi ya Congo, yongeye gutakambira amahanga ayasaba gufatira u Rwanda ibihano.
Kinshasa ishinja u Rwanda kuba ari rwo ruri inyuma y’umutwe wa M23 bamaze imyaka irenga itatu bari mu ntambara, n’ubwo rwo rwakunze gutera utwatsi ibyo birego.
Tshisekedi ku wa Gatandatu w’icyumweru gishize ubwo yakiraga abadipolomate bahagarariye ibihugu n’imiryango itandukanye muri RDC, yabasabye gufatira ibihano bifatika u Rwanda.
Ati: “Repubulika Iharanira Demokarasi ya Congo ntisaba inkunga. Irasaba ubufatanye buboneye kandi buringaniye bushingiye ku kubaha ubusugire ndetse n’uburenganzira bwayo bw’ibanze. Ubu bufasha si itonesha. Umuryango mpuzamahanga kuri ubu ugomba kuva mu magambo ugakora ibikorwa bifatika. Ibihano ku Rwanda, ku bayobozi barwo b’igisirikare n’abapolitiki bagize uruhare muri iri hohoterwa ndetse no ku miyoboro yarwo y’imari birakwiye.”
Tshisekedi yakiriye abadipolomate nyuma y’amasaha make mugenzi we Paul Kagame w’u Rwanda na we yakiriye abadipolomate bahagarariye ibihugu bitandukanye i Kigali.
Mu byo Congo Kinshasa n’inshuti zayo zishinja u Rwanda harimo kuba rufite muri Kivu y’Amajyaruguru ingabo zibarirwa mu bihumbi.
Umukuru w’Igihugu ubwo yakiraga bariya badipolomate, yasabye abashinja Ingabo z’u Rwanda kuba mu Burasirazuba bwa Congo kwibaza impamvu zikwiriye kujyayo.
Ati: “Niba utekereza ko u Rwanda ruri mu Burasirazuba bwa Congo guteza ibibazo, ese ushobora kwigora ugafata umwanya ukibaza impamvu u Rwanda rushobora kujya kurwana mu Burasirazuba bwa Congo? Kubera iki? Ukwiriye gusubiza icyo kibazo, kuko wenda ahari kizakugeza ku bintu ukwiriye gukemura aho kubyihunza.”
Perezida Paul Kagame yananenze Umuryango w’Abibumbye ndetse n’amahanga bakomeje kwikoreza u Rwanda umuzigo w’ibibazo bya Congo, nyamara ari bo bakabaye barabikemuye ubwo mu myaka 30 ishize boherezaga muri iki gihugu.
