U Rwanda rwatoranyijwe kwakira ibirori by’abafana ba Arsenal muri Afurika bizaba ku nshuro ya gatandatu hagati ya tariki ya 18 na 20 Mata 2025.
Ibi ibirori bizahuza abafana b’ikipe y’umupira w’amaguru ya Arsenal bo muri Afurika aho bazakora ibikorwa byo gufasha abatishoboye, bakine indi mikino ndetse bagire n’umwanya wo kwishimisha no gusura ubwiza nyaburanga bw’u Rwanda.
Ibihugu byamaze kwemeza ko bizitabira iyi festival birimo u Rwanda, Sudani y’Epfo, Ghana, Nigeria, Kenya, Uganda, Zambia, na Tanzania.
Mu myaka irenga itanu ishize, u Rwanda rufitanye amasezerano y’ubufatanye na Arsenal binyuze mu bikorwa byo guteza imbere ubukerarugendo hifashishijwe gahunda ya “Visit Rwanda”.
Ibi ibirori bizaba ari umwanya mwiza wo kumenyekanisha u Rwanda nk’ahantu nyaburanga no gukomeza gushimangira umubano w’u Rwanda n’iyi kipe ikomeye yo mu Bwongereza.
