Perezida w’ihuriro AFC ry’imitwe ya politiki n’umutwe witwaje intwaro wa M23, Corneille Nangaa, yatangaje ko intambara yabo igifite intego yo gukuraho ubutegetsi bwa Repubulika Iharanira Demokarasi ya Congo buri i Kinshasa.
Ni ubutumwa yatanze kuri uyu wa 22 Mutarama 2025, mu gihe Leta ya RDC ifite impungenge ko abarwanyi ba M23 bashobora gufata umujyi wa Goma nyuma y’aho bafashe santere ya Minova tariki ya 21 Mutarama 2024.
Umusirikare wa RDC waganiriye n’ikinyamakuru Libre cyo mu Bubiligi yatangaje ko bamaze gutsindwa iyi ntambara, kuko icyo bari gukora ubu ari ukugerageza guca intege abarwanyi ba M23, aho kwisubiza ibice bambuwe.
Yagize ati “Twatsinzwe intambara. Ubu turi mu ntambara yo guca intege. Twatentebutse bigaragara rwose. Turi kugerageza guca intege umwanzi uko dushoboye ariko nta mpamvu tugifite. Abasirikare ntabwo bahembwa, nta ntwaro zihagije bafite, bagaburirwa bike.”
Nangaa yasobanuye ko abarwanyi babo badahanganye n’ingabo za RDC kuko ari Abanye-Congo bene wabo, ahubwo bahanganye n’ingabo z’u Burundi n’umutwe w’iterabwoba wa FDLR, bo bigaragara ko bagifite imbaraga.
Yagize ati “Ntabwo turi kurwanya abasirikare ba Congo. Ni Abanye-Congo nkatwe. Abanzi bacu, bafite imbaraga, ni ingabo z’u Burundi na FDLR.”
Perezida wa AFC kandi yasobanuye ko nubwo ingabo ziri mu butumwa bw’amahoro bw’Umuryango w’Abibumbye (MONUSCO) n’iz’umuryango wa Afurika y’amajyepfo (SADC) ziri kubarwanya, na zo atari umwanzi wabo.
Umuganga ukorera muri Bukavu yagaragaje ko mu gihe cya vuba, M23 ishobora gufata uyu mujyi uherereye mu ntara ya Kivu y’Amajyepfo, kuko ubutegetsi bw’iki gihugu budashyize umutima kuri iyi ntambara, nubwo bubeshya abaturage ko bakwiye kubwizera.
Yagize ati “Leta iri kugerageza guhumuriza abaturage ariko ntabwo bakiyizera. Abaturage bakomeje kunenga Félix Tshisekedi. Bagereranya Perezida wacu ujya kureba umukino w’umupira w’amaguru mu gihe umujyi wa Masisi wafashwe na Zelensky wibanda cyane ku ntambara yo muri Ukraine.”
Umucuruzi wo mu mujyi wa Sake na we yanenze Perezida Tshisekedi, ati “Uyu munsi ari i Davos mu Busuwisi. Ejo azaba ari muri Afurika y’Epfo mu kwizihiza isabukuru y’amavuko y’umuvandimwe we. Twebwe turi i Sake, mu bilometero bike werekeza i Goma, tubona inyeshyamba mu marembo yacu.”
Nangaa yasobanuye ko koko abarwanyi babo bafite umugambi wo gufata RDC yose, bagakuraho ubutegetsi bwa Perezida Tshisekedi bukomeje gusenya inzego zigize igihugu cyabo.
Yagize ati “Intego yacu iracyari gufata Kinshasa. Dushaka kubohora Congo yose. Dushaka kubaka iki gihugu, tugakuraho iyi Leta isa n’itariho. Dushaka kubaka byose, igisirikare, polisi, ubutabera, imiyoborere, mbese ibiri kubura uyu munsi.”
Uyu munyapolitiki yakomeje ati “Turi Abanye-Congo, twashoje intambara kuri Leta ya Kinshasa itubahiriza inshingano ifite ku Banye-Congo, ahubwo igakorera abenshi mu baturanyi.”
