Ikipe y’u Rwanda yo gusiganwa ku magare yahagurutse mu Rwanda yerekeza mu isiganwa rya Tour of Sharjah 2025, rizabera muri Leta Zunze Ubumwe z’Abarabu.
Abakinnyi b’Ikipe y’Igihugu bari bamaze hafi amezi abiri mu Karere ka Musanze mu mwiherero witegura iri rushanwa, aho bafashwaga n’Umutoza Wungirije w’Ikipe y’Igihugu, Sempoma Félix.
Abakinnyi uyu mutoza yahisemo kwifishisha ni Mugisha Moïse, Munyaneza Didier, Uwiduhaye Paul, Nzafashwanayo Jean Claude, Masengesho Vainqueur na Nkundabera Eric.
Mbere yo kuva mu Rwanda, Sempoma yavuze ko ari isiganwa ajyanyemo abakinnyi yizeye kandi ko rizanamufasha gutegura Tour du Rwanda, izaba mu impera za Gashyantare 2025.
Ati “Ikipe dufite ni nziza umuntu ashobora guha icyizere, kuko kubategura no kubatoranya ntabwo twibeshye. Tour of Sharjah kandi ni isiganwa ribanziriza Tour du Rwanda, ni ryo twahisemo kugira ngo twitegure iryo mu Rwanda.”
Tour of Sharjah ni isiganwa rigiye gukinwa ku nshuro ya cyenda. Ryari risanzwe rikinirwa mu mihanda irambuye, gusa uyu mwaka ryashyizwemo n’inzira z’imisozi zizafasha cyane abakinnyi b’Abanyarwanda.
Ikipe y’u Rwanda kandi yajyanye n’uzaba ushinzwe kwita ku magare, Maniriho Eric, ndetse n’umuganga w’abakinnyi, Ruvogera Obed.
Abakinnyi bazakina uduce dutanu, guhera tariki 24 kugeza ku wa 28 Mutarama 2025.
