Umugaba Mukuru w’Ingabo za Uganda akaba n’Umujyanama wa Perezida Yoweri Museveni mu bikorwa byihariye by’igisirikare, Gen Muhoozi Kainerugaba, yahamagariye abaturage kujya mu myigaragambyo yamagana abadepite.
Mu gitondo cyo kuri uyu wa 23 Mutarama 2025, Gen Muhoozi yatangaje ko Inteko Ishinga Amategeko ya Uganda ari rwo rwego rwa Leta rwamunzwe na ruswa kurusha izindi nzego, asaba abaturage kuyamagana.
Yagize ati “Njyewe Muhoozi Kainerugaba, umuhungu wa Yoweri Museveni, nsabye Abanya-Uganda bakunda igihugu bose kwitabira imyigaragambyo ikomeye yamagana Inteko Ishinga Amategeko. Inteko ni rwo rwego rwamunzwe na ruswa cyane muri iki gihugu! Icyo bakora ni ukwikungahaza gusa no kutwiba!”
Gen Muhoozi yasobanuye ko muri iyi myigaragambyo iteganyijwe tariki ya 10 Gashyantare 2025, abazayitabira bazereka abadepite imbaraga z’Imana, cyane ko ububasha bwose ari ubwayo.
Uyu musirikare atanze ubu butumwa mu gihe abadepite bagize Komisiyo ishinzwe ingabo bakomeje kumuhamagaza kugira ngo abahe ibisobanuro ku magambo yatangarije ku rubuga nkoranyambaga rwa X, yibasira bimwe mu bihugu n’abanyapolitiki barimo Robert Kyagulanyi uzwi nka Bobi Wine na Dr. Kizza Besigye.
Nyuma y’iminsi itatu yanze kwitaba abadepite, Gen Muhoozi tariki ya 20 Mutarama yatangaje ko azabafungwa, ati “Ntabwo nzajya imbere y’aba badepite bagize Inteko Ishinga Amategeko. Ahubwo bose nzabafunga.”
Abadepite bahamagaje Gen Muhoozi mu gihe bari mu gikorwa cyo gusuzuma ibikubiye mu ngengo y’imari ya Minisiteri y’Ingabo. Uyu musirikare ntiyumva ukuntu aho kwibanda ku gikorwa nyirizina, bibanda ku byo yavugiye kuri X.
