Urukiko rwa Liverpool mu Bwongereza rwakatiye Axel Rudakubana igifungo cy’imyaka 52, nyuma yo kumuhamya icyaha cyo kwica abana batatu no kugerageza kwica abandi bantu 10.
Urukiko rwasobanuye ko mu gukatira Rudakubana w’imyaka 18 y’amavuko habayemo koroshya kuko kubera ibyaha yahamijwe, yakabaye akatirwa igifungo cya burundu.
Isomwa ry’uyu mwanzuro ryatinze kuko Rudakubana yabanje kuzonga urukiko mu gitondo cyo kuri uyu wa 23 Mutarama. Yasakuje cyane, arumenyesha ko akeneye umuganga umwitaho kuko arwaye.
Rudakubana yakoze ibi byaha ubwo yari afite imyaka 17 y’amavuko, tariki ya 29 Nyakanga 2024. Icyo gihe we n’aba bana (Alice da Silva Aguiar, Bebe King na Elsie Dot Stancombe) bari mu gace ka Southport.
Umushinjacyaha yasobanuye ko ubwo Rudakubana yatabwaga muri yombi, yabwiye abapolisi ko yishimiye ko aba bana bapfuye, ati “Nishimiye ko aba bana bapfuye. Biranshimishije. Ntacyo bimbwiye, ndumva ntacyo mbaye.”
Yasobanuye kandi ko mu gitanda cy’uyu musore hafatiwe uburozi bwa ‘Ricin’ yakoze yifashishije ibikoresho yaguriye kuri Amazon mu ntangiriro za 2022. Gusa ngo ntibwari bukaze kuko ibinyabutabire byari bibugize byashobora kwangiza umuntu ari bike.
Ku nyandiko y’umutwe w’iterabwoba wa Al Qaeda uyu musore yafatanywe, Umushinjacyaha yasobanuye ko yari ikubiyemo amabwiriza yashingiyeho atera icyuma aba bana, kugeza abishe.
Ubwo uyu musore yari yicaye mu rukiko, ategereje kumva igihano ahabwa, yavuze mu ijwi rirenga ati “Ntabwo nkomeza guceceka. Maze iminsi 10 ntarya. Nkeneye umuganga unyitaho kuko ndumva ndwaye.”
Ikinyamakuru Sky News cyatangaje ko Rudakubana yasabye urukiko kudasoma uyu mwanzuro, ubwo Umushinjacyaha yari afite ijambo. Umucamanza Goose yategetse ko asohorwa mu cyumba cy’iburanisha.
Rudakubana yasakuje mu gihe kigera ku masegonda 30, biba ngombwa ko gusoma umwanzuro w’urubanza bisubikwa, byimurirwa ku gicamunsi.
Abacamanza n’ababuranyi barimo Rudakubana basubiye mu rukiko. Umushinjacyaha yongeye guhabwa ijambo kugira ngo agire icyo avuga kuri uru rubanza.
Umucamanza Goose yasobanuye ko abaganga babiri b’urukiko rwa Liverpool basuzumye Rudakubana, basanga afite ubushobozi bwo kwitabira isomwa ry’uru rubanza. Yanzuye ko gahunda yateganyijwe ikomeza uko yakabaye.
Nyuma yo kumva uruhande rw’Ubushinjacyaha, uregwa n’abakomerekejwe na Rudakubana, Umucamanza Goose yatangaje ko uyu musore akatiwe igifungo cy’imyaka 52.
Tariki ya 17 Ukuboza 2024, Rudakubana yanze gusubiza urukiko ubwo yasobanurirwaga ibyaha ashinjwa, atungurana yemera ibyaha byose tariki ya 20 Mutarama 2025.
