Umutwe witwaje intwaro wa M23 wongeye kuburira ingabo ziri mu butumwa bw’amahoro bw’Umuryango w’Abibumbye muri Repubulika Iharanira Demokarasi ya Congo (MONUSCO) n’iz’umuryango wa Afurika y’Amajyepfo (SAMIDRC) ziri kwivanga mu ntambara iri kubera mu ntara ya Kivu y’Amajyaruguru.
Mu muhanda wa Goma-Sake hagaragaye amakamyo menshi atwaye abasirikare bari mu butumwa bwa Loni n’aba SAMIDRC bakomoka muri Tanzania, Afurika y’Epfo na Malawi, bisuganya kugira ngo bafashe ingabo za RDC gukura M23 muri Sake.
Umuvugizi wa M23 mu rwego rwa politiki, Lawrence Kanyuka, kuri uyu wa 23 Mutarama yatangaje ko ibimenyetso byose bigaragaza ko abasirikare ba MONUSCO na SAMIDRC bitegura gufasha ihuriro rya Leta ya RDC mu kurwanya uyu mutwe, abamenyesha ko witeguye guhangana na bo.
Kanyuka yatangaje ko ingabo za Loni na SAMIDRC byirengagije umuburo yatanze, zijya gukorana n’ihuriro ry’ingabo z’abajenosideri, rikunze kugaba ibitero mu bice bituwemo n’abaturage benshi.
Kanyuka yabujije abasirikare ba MONUSCO na SAMIDRC kwivanga muri iyi ntambara, abasubiriramo ko M23 yiteguye gukoresha uburenganzira bwose ifite bwo kwirwanaho.
Yagize ati “Ku bw’ibyo, dushimangiye ko kwivanga, gukorana, cyangwa gutanga ubufasha mu buryo butaziguye cyangwa buziguye kw’izi ngabo za Loni na SADC, kuratuma abarwanyi bacu bakoresha uburenganzira bwose bafite bwo kwirwanaho.”
Nk’uko yari yabitangaje kuri uyu wa 23 Mutarama, M23 yasubiyemo ko ishaka gufata umujyi wa Goma uri mu bilometero birenga gato 20 uva i Sake, kugira ngo ihagarike akababaro k’Abanye-Congo bawutuyemo.
