Perezida Paul Kagame yagaragaje Türkiye nk’umufatanyabikorwa mwiza w’u Rwanda by’umwihariko mu iterambere rijyanye n’ibikorwaremezo n’izindi nzego.
Umukuru w’Igihugu yabivuze amaze kugirana ibiganiro na mugenzi we wa Türkiye, Recep Tayyip Erdoğan, byabereye mu Mujyi wa Ankara kuri uyu wa Kane, tariki ya 23 Mutarama 2025.
Perezida Kagame uri mu ruzinduko muri Türkiye yakiriwe na mugenzi we Recep Tayyip Erdoğan mu cyubahiro gihabwa abakuru b’ibihugu mu Ngoro y’Umukuru w’Igihugu (Presidential Complex) iherereye mu Mujyi wa Ankara.
Abakuru b’ibihugu byombi bagiranye ibiganiro byabereye mu muhezo ndetse nyuma habaho ibiganiro byahuje amatsinda yabaherekeje, mbere y’uko hasinywa amasezerano y’ubufatanye mu nzego zitandukanye.
Mu kiganiro n’itangazamakuru, Perezida Kagame yongeye kwihanganisha Türkiye ku nkongi y’umuriro yibasiye hoteli iri mu Mujyi wa Bolu, igahitana abaturage 78, abandi bagakomereka.
Umukuru w’Igihugu yanashimangiye ko u Rwanda na Türkiyebihuriye kuri byinshi birimo n’umubano wihariye; ibyo asanga bizatanga umusaruro ufatika by’umwihariko mu rwego rw’ibikorwaremezo.
Ati “Mu rwego rw’iterambere ry’ibikorwaremezo, turashima cyane ishoramari ry’Abanya-Türkiye ndetse n’ubufasha twahawe ubwo mu minsi ishize twavugururaga Stade Amahoro nka rumwe mu ngero rw’ibyo bakoze cyane ko hari n’indi mishinga iri mu nzira zo kuyishyira mu bikorwa. Rero hano sinabura gushima ikigo cyo muri Türkiyecya SUMMA kandi nabonye n’abayobozi bacyo hano. Nashakaga kubashima ku ruhare rw’abo bagize muri iri terambere ry’ibikorwaremezo mu gihugu cyacu, ibyaje kugezwa no mu karere ndetse n’ahandi.’’
Perezida Kagame yashimye Türkiye nk’umufatanyabikorwa mu bikorwa by’ubuhuza mu gushaka amahoro n’umutekano ndetse agaragaza ko ingufu iki gihugu kibishyiramo zanafasha mu gukemura ikibazo cy’umutekakano muke muri Repubulika Iharanira Demokarasi ya Kongo.
Ati “Nyakubahwa Perezida ndashaka kugushimira ku bw’ingufu mushyira mu buhuza, by’umwihariko turabashimira ku bw’ingufu mwashyize mu guhuza Somalia na Ethiopia mu bihe bishize. Rero biranashoboka ko izo mbaraga zanyu mu buhuza zishobora no kugirira akamaro ko kugarura amahoro n’umutekano mu karere kacu by’umwihariko muri Repubulika Iharanira Demokarasi ya Congo.’’
Umukuru w’Igihugu yagaragaje ko ibibazo by’umutekano bikomeje kugaragara ku Isi bikwiye gusigira isomo ibihugu mu kwishakamo ibisubizo aho kwihunza inshingano.
U Rwanda na Türkiye ni ibihugu bisanzwe bifitanye imikoranire myiza kandi yakomeje gutanga umusaruro, binyuze mu masezerano y’ubutwererane ibihugu byombi byagiye bisinyana mu nzego zitandukanye, zirimo ubucuruzi n’ishoramari, umutekano, ubwirinzi n’igisirikare, uburezi, gukuraho za Viza, umuco na dipolomasi.
U Rwanda na Türkiye bikorana ishoramari rihuriweho rifite agaciro kagera kuri miliyoni 500$, rivuye kuri miliyoni 1$ mu 2000.
