Umucamanza wa leta muri Seattle yahagaritse by’agateganyo icyemezo teka cyatanzwe na Perezida Donald Trump cyashakaga kuvanaho ubwenegihugu bw’amavuko muri Amerika.
Iki cyemezo cyafashwe ku wa Kane nyuma y’uko Umucamanza w’Akarere muri Amerika, John Coughenour yemeye icyemezo gihagarika by’agateganyo iri teka, bihagarika ishyirwa mu bikorwa ry’iyi politiki mu gihe cy’iminsi 14 mu gihe urukiko rugisuzuma ibyayo.
Iri teka ryashyizweho umukono na Trump ku munsi we wa mbere agarutse ku butegetsi, ritegeka ibigo bya leta kwanga ubwenegihugu ku bana bavukiye muri Amerika niba nta mubyeyi ufite ubwenegihugu cyangwa icyemezo cyo gutura bihoraho.
Iki cyemezo kigaragaza icyemezo cya mbere gikomeye cya perezida cyasubitswe n’amategeko mu gihe Trump ari gushyira ingufu mu kuvugurura amategeko y’ubwenegihugu bwa Amerika.
Nk’uko tubikesha The Washington Post, Umucamanza yagize ati: “Biragaragara ko binyuranyije n’Itegeko Nshinga.”
Umucamanza Coughenour washyizweho n’uwahoze ari Perezida wa Repubulika, Ronald Reagan, ntiyigeze arya iminwa mu gihe cy’iburanisha, avuga ko iteka rya pererezida “rinyuranyije n’amategeko.”
Mu gusubiza Minisiteri y’Ubutabera yarengeraga aya mabwiriza, umucamanza yagaragaje ko atizera ko umunyamwuga uwo ari we wese mu by’amategeko ashobora gutekereza ko iryo tegeko ryubahirije itegeko nshinga.
