Ku Cyumweru tariki 26 Mutarama 2025, ikipe ya Rayon Sports yungutse Fan Club nshya yitwa ‘Rayon Sports Special Fan Club’ yafunguwe mu Karere ka Kicukiro.
Ni Fan Club yafunguwe n’ubuyobozi bwa Rayon Sports bwarimo Perezida w’ikipe Twagirayezu Thaddée, Umuyobozi w’Urwego rw’Ikirenga Paul Muvunyi, ndetse n’ubuyobozi bw’amahuriro ya Fan Clubs za Rayon Sports bwari buhagarariwe na Dr Norbert Uwiragiye.
Nyuma yo gufungurwa ku mugaragaro, Rayon Sports Special Fan Club yahise ishyiraho ubuyobozi bw’agateganyo buyobowe na Hadji Mohamed Kanyabugabo, wavuze ko yagize igitekerezo cyo kuyishinga na bagenzi be kugira ngo bafashe ubuyobozi bw’ikipe.
Ati “Ni Fan Club ije gufasha ubuyobozi bwa Rayon Sports haba mu nkunga y’ubushobozi bw’amafaranga ndetse n’ibitekerezo, kuko na yo ije yiyongera ku zindi zituma ubushobozi bubonetse ariho bunyuzwa bukagera ku ikipe. Ubuyobozi bwa Rayon Sports buri gushishikariza abantu kongera amatsinda y’abafana, kuko iyo wahuje abantu n’ubushobozi buba bwabonetse.”
Ubuyobozi bwa Rayon Sports kandi kuri iki Cyumweru, bwanasuye Fan Clubs ebyiri zirimo Isaro Fan Club y’i Muhanga, ndetse n’Ishema ry’Umu-Rayon aho abasuwe basezeranyijwe ko hazakorwa ibishoboka byose ngo ikipe ikegukana igikombe cya shampiyona 2024-2025, nabo basabwa kongera imisanzu kuko ari yo izashyigikira ubuyobozi muri uru rugendo.
Rayon Sports ubushobozi bwayo bwinshi bushingira ku bakunzi bayo cyane, haba abibumbiye mu matsinda ndetse n’abandi aho kugeza ubu Fan Clubs zimaze kuba 48, mu gihe ubuyobozi bushya bw’iyi kipe buvuga ko bufite intego yo kugira amatsinda y’abafana 80 nibura.
