Igisirikare cy’u Rwanda (RDF), kuri uyu wa Mbere tariki ya 27 Mutarama cyemeje ko ingabo za Repubulika Iharanira Demokarasi ya Congo (FARDC) n’umutwe wa FDLR barashe ku butaka bw’u Rwanda.
Ni amakuru yemejwe n’umuvugizi wa RDF, Brig Gen Ronald Rwivanga, mu kiganiro na The New Times.
Kuva mu gitondo cyo kuri uyu wa Mbere, mu duce tw’akarere ka Rubavu by’umwihariko mu mujyi wa Gisenyi hagiye haraswa ibisasu ndetse n’amasasu mato; ibyatumye hari abaturage benshi bakomerekejwe na yo.
Nko mu Mbugangari ho mu mujyi wa Gisenyi amakuru avuga ko hari abaturage babarirwa muri 15 bakomerekejwe n’amasasu yaturutse muri Congo, aho ingabo z’iki gihugu zikomeje kurwanira n’inyeshyamba zo mu mutwe wa M23 kuri ubu zigenzura ibice bitandukanye by’Umujyi wa Goma.
Amakuru kandi avuga ko hari bamwe mu baturage bo mu karere ka Rubavu baba batakaje ubuzima.
Icyakora n’ubwo Ingabo za RDC zarashe mu Rwanda ibisasu, ibyinshi muri byo byagiye bipfubywa na Système irinda ikirere cy’u Rwanda izwi nka ‘Iron Dome’.
Kuri ubu mu mujyi wa Gisenyi ibikorwa bitandukanye birimo iby’ubucuruzi ndetse n’amashuri byabaye bifunze, mu rwego rwo kwirinda ko hari abicwa cyangwa bagakomeretswa n’amasasu ari kurasirwa mu mujyi wa Goma.
Hagati aho abanye-Congo benshi barimo n’abasirikare barenga 100 bakomeje guhungira mu Rwanda, aho bakiriwe n’inzego zitandukanye mbere yo kujyanwa mu kigo cya Vision Nouvelle Jeunesse kiri i Gisenyi.
