U Rwanda rugiye kongerera abajyanama b’ubuzima ubushobozi bwo gufasha inzego zibishinzwe guhangana n’indwara zidakira zirimo na Kanseri.
Ibi Minisitiri w’Ubuzima Dr Sabin Nsanzimana yabigarutseho ubwo yari mu Nteko Ishinga Amategeko umutwe w’Abadepite, aganira n’Abadepite bagize Komisiyo y’Imiyoborere, Uburinganire n’Ubwuzuzanye bw’Abagabo n’Abagore harebwa uko urwego rw’ubuzima rwarushaho gukora neza no gutanga serivise ku barugana.
Minisitiri Dr Nsanzimana avuga ko abajyanama b’ubuzima basanzwe bafasha Leta mu gusuzuma indwara zitandukanye zirimo Marariya, gusuzuma umugore utwite, kwita ku mikurire y’umwana no kurwanya igwingira.
Ati “ Ubundi hari ibyo twabahuguyemo nko gupima umubyibuho ukabije, Diabete n’umuvuduko w’amaraso ariko turashaka no kubongerera ubumenyi bwo kumenya bimwe mu bimenyetso by’indwara ya Cancer ku buryo uwo bakeka ko ayifite bahita bamwohereza kwa muganga nk’uko basanzwe babigenza ku zindi ndwara”.
Dr. Nsanzimana yagaragaje ko umusanzu abajyana b’ubuzima batanze ari mwiza kandi ko bifuza ko bakomeza kugira uruhare no mu kurwanya zimwe mu ndwara zitandura.
Ati “Abajyanama b’ubuzima bafite uruhare runini mu rwego rw’ubuzima. Tubona ko ari bo musingi w’urwego rw’ubuzima. Abantu tureberera urwego rero turavuga ngo buriya mu minsi iri imbere ni ibiki bazakomeza kudufasha? Hari indwara nyinshi babashaga kuvura ariko hari n’izindi zagiye ziyongeraho cyane cyane izitandura bakaba babasha kuzisuzuma. Ni naho tubona bazakomeza kugira uruhare.”
Minisitiri avuga ko impamvu bizashoboka ari ukubera ko uru rwego rw’abajyanama b’Ubuzima ubu hasigaye hajyamo abantu bakiri bato kandi bize.
Ati “ Kuko harimo n’abarangije ikiciro cy’amashuri yisumbuye bakaba bafite ibikoresho birimo na terefone binjizamo amakuru yose arebana n’ibyo bakora bizafasha cyane guhangana n’izi ndwara zidakira”.
Minisitiri yavuze ko ubu abajyanama bakuze bagenda basimbuzwa buhoro buhoro bitewe n’imyaka bagezemo.
Gusa avuga ko atari ibintu bigamije kubuza abakuze kujya muri izi serivise kuko usanga abari muri iki kiciro cy’iyi myaka bagirirwa ikizere nabo bigafasha abo bavura gukira.
Ati “ Kubongerera ubushobozi biradufasha kuvura kare, abantu ntibarembere mu rugo cyangwa ngo bitume indwara ikura umuntu ugasanga adahawe ubufasha vuba uko bikwiriye.”
Minsitiri w’Ubuzima yasobanuye ko Kanseri mu Rwanda hari izishobora gutahurwa hakiri kare kuburyo umuntu nawe aramutse yisuzumye ashobora kubimenya akajya kwa muganga itarakura.
Ati “ Navuga nka Kanseri y’ibere buriya umuntu wese ashobora kubona ibimenyetso byayo, ntakindi bisaba ni ugukandakanda ibere igihe wumvisemo akantu kameze nk’akabyimba ukihutira kwisuzumisha. Ibyo rero n’abajyanama babifasha ababyeyi kumenya ikibazo bafite igihe babagannye”.
Minisitiri Dr Nsanzimana avuga ko Kanseri y’ibere iza ku mwanya wa mbere mu guhitana ubuzima bw’abantu bikaba bisaba ubufatanye bw’inzego zose mu kuyirandura.
Indi ni Kanseri y’inkondo y’umura ikunze kwibasira igitsinagore, nayo Leta ifite gahunda yo kuyirandura kuko biteganyijwe mu kwezi kwa kabiri ababyeyi bose bakazasuzumwa kikaba ari igikorwa abajyanama b’Ubuzima bazagiramo uruhare ndetse n’abakobwa bakiri bato ku myaka 18 bacikanywe no gufata urukingo bazaruhabwa.
Iza ku mwanya wa Gatatu ni ‘prostate cancer’ ifata abagabo ku myanya y’ibanga ndetse hakabaho n’iyurwungano ngogozi kuva mu muhogo kugera aho umwanda usohokera.
Ati “Yo nibiyitera birazwi, birimo itabi, inzoga uko unyoye umusemburo ugenda ukorobora aho inyura bigahindura mu muhogo bikangiza n’inzira y’igogora, iyo umunwa watangiye guhindura ibara biba ari ibindi bindi nabyo ni ikimenyetso cy’uko hari ibiri guhinduka ku muntu bikaba byaba byiza agize ibyo yitondera”.
Minisitiri avuga ko Kanseri ari uguhinduka k’uturemangingo tw’ahantu mu mubiri noneho tugakura mu buryo burimo akajagari tukaba tunini nyuma hakaza ikibyimba kikabyara Kanseri.
Minisitiri W’ubuzima avuga ko uburyo bwiza bwo kwirinda iyi kanseri y’urwungano ngogozi abantu bakwirinda kunywa inzoga nyinshi, ndetse kurya ibiryo bishyushye cyane, urusenda rwinshi kuko byangiza inzira y’igogora.
Kanseri yindi ni ifata umwijima akenshi iterwa na Hepatitis B, n’inzoga ndetse n’ibiyobobyabwenge. Umwijima urabibika ukageza ubwo uturemangingo twawo twangirika ukarwara bikazavamo Kanseri.
