Umukinnyi Neymar Junior yaseshe amasezerano n’ikipe ya Al Hilal yo muri shampiyona ya Arabia Saudite nyuma y’umwaka n’igice ayigezemo akenyerera ku mafaranga arenga Miliyari 30 z’Amanyarwanda.
Iyi kipe niyo yabitangaje ibinyujije ku mbuga nkoranyambaga zayo mu rukerera rwo kuri uyu wa Kabiri tariki ya 28 Mutarama 2025 aho yavuze ko impande zombi yemeranyije gutandukana irangije imwifuriza amahirwe masa.
Nk’uko ikinyamakuru ESPN cyabitangaje Neymar Jr nubwo yatandukanye nayo ariko yahawe Miliyoni 30 z’Amadolari muri 65 z’Amadorali yari kuzahembwa mu masezerano y’amezi atandatu yari agifitanye nayo.
Mu mpeshyi ya 2023 ni bwo uyu mukinnyi yari yavuye mu ikipe ya Paris Saint-Germain yari amazemo imyaka 6, yerekeza mu ikipe ya Al Hilal gusa yagiye ahura n’ibibazo by’imvune cyane dore kugeza ubu yari amaze kuyikinira imikino 9 gusa aho yatsinzemo igitego 1 gusa.
Umutoza wa Al Hilal, Jorge Jesus yaherukaga gutangaza ko batigeze bandikisha Neymar mu bakinnyi bazakoresha mu mikino yo kwishyura ya shampiyona dore ko urwego rwayo rwamusize.
Yagize ati: “Shampiyona ya Arabia Saudite ni imwe muri shampiyona nziza ku Isi. Abakinnyi bose ba Al-Hilal bashobora gukinira amakipe yose yo ku mugabane w’i Burayi.
Neymar ntabwo ashoboye gukomeza gukina ku rwego turiho. Ibintu byaramugoye, birababaje”.
