APR FC yatsinze AS Kigali ibitego 2-0 mu mukino wa 1/2 cy’Igikombe cy’Intwari cya 2025, ibona itike yo gukina umukino wa nyuma.
Uyu mukino wabaye kuri uyu wa Kabiri tariki ya 28 Mutarama 2025, ubera kuri Kigali Pele Stadium.
Igikombe cy’Intwari mu mupira w’amaguru gitegurwa na FERWAFA ku bufatanye n’Urwego rushinzwe Intwari z’Igihugu, Imidali n’Impeta by’Ishimwe (CHENO), cyitabiriwe n’amakipe ane ya mbere aho Shampiyona iba igeze mu mpera za Mutarama.
Muri uyu mukino, APR FC yabanje mu kibuga abakinnyi bashya bayo bakomoka muri Uganda, Denis Omedi na Kiwanuka Hakim.
Uburyo bwa mbere bwabonetse ku munota wa 10 ku mupira mwiza wahinduriwe Mugisha Gilbert ari mu rubuga rw’amahina, ateye ishoti ryitambikwa na Frank Onyeabor, umupira ujya muri koruneri itagize icyo itanga.
Ku munota wa 24‘ AS Kigali yabonye uburyo bwiza bw’igitego. Ku mupira Haruna Niyonzima yahaye Ntirushwa Aime wateye ishoti rikomeye, rikurwamo na Pavelh Ndzila mbere y’uko APR FC ishyira umupira muri koruneri kuko Tchabalala yashakaga gutsinda.
Kugeza ku munota 35, umupira wakinirwaga cyane mu kibuga hagati mu kibuga, AS Kigali ari yo isatira cyane kurusha APR FC yari yihariye iminota 20 ibanza.
Ku munota wa 39’, APR FC yabonye uburyo bwo gutsinda igitego ku mupira Hakim Kiwanuka yahinduye mu rubuga rw’amahina rwa AS Kigali Mugisha Gilbert, Denis Omedi na Ruboneka bagorwa no kuwutsinda, umusifuzi wo ku ruhande agaragaza ko hari habayeho kurarira.
Igice cya mbere cyarangiye amakipe yombi anganyije ubusa ku busa.
Mu gice cya kabiri’, APR FC yagarukanye imbaraga itangira gusatira izamu rya AS Kigali harimo uburyo bwo ku munota wa 50’ Mugisha Gilbert yacenze Nkubana Marc yinjira ahagana inyuma y’urubuga rw’amahina, ateye ishoti rinyura hejuru y’izamu rya AS Kigali ryari ririzwe na Cyuzuzo Gael.
Ku munota wa 55’ APR FC yabonye Penaliti ku mupira wahinduwe na Mugisha Gilbert usanga Lamine Bah uwuteye mu izamu uvamo, awusubijemo ujya hejuru, ariko ahuriza hamwe n’umusifuzi ko myugariro wa AS Kigali yawukuyemo n’ukuboko, hatangwa penaliti.
Iyi Penaliti yinjijwe neza na Rutahizamu mushya Denis Omedi.
Ku munota wa 72’, AS Kigali yabonye uburyo bwo kwishyura igitego ku mupira Haruna Niyonzima yateye, ashaka gutsinda ariko Dauda Yussif awukozaho umutwe uvamo.
Ku munota wa 76, umutoza wa APR FC yakoze impinduka Denis Omedi, Hakim Kiwanuka na Mamadou Lamine Bah basimburwa na Tuyisenge Arsene, Dushimimana Olivier ‘Muzungu’ na Niyibizi Ramadhan.
Ku munota wa 79’ APR FC yabonye igitego cya kabiri cyatsinzwe na Niyibizi Ramadhan Kuri Coup-Franc nyuma y’ikosa Dushimimana Olivier ‘Muzungu’ yari akiniwe nabi na Benedata Janvier hafi y’urubuga rw’amahina mu ruhande.
APR FC yarushaga AS Kigali cyane yongeye kubona amahirwe yo gutsinda igitego cya Gatatu ku mupira Dushimimana Olivier yahinduye mu rubuga rw’amahina, usanga Tuyisenge Arsene uwuserebetse, ku bw’amahirwe ye make uhura n’Umunyezamu Cuzuzo Aime Gael uvamo.
Umukino Warangiye APR FC itsinze AS Kigali ibitego 2-0 ibona itike yo gukina umukino wa nyuma w’Igikombe cy’Intwari cya 2025.
Ku mukino wa nyuma izahura n’ikipe ikomeza hagati ya Rayon Sports na Police FC mu mukino uteganyijwe ku mugoroba wo kuri uyu wa Kabiri saa kumi n’ebyri.
Umukino wa nyuma uteganyijwe ku wa Gatandatu, tariki ya 1 Gashyantare 2025.
