Rutahizamu wa Police FC, Byiringiro Lague yagaragaje ko gutsinda Rayon Sports zari intego ze, cyane ko abafana bayo ari bamwe mu bashidikanyije ku rwego rwe.
Ibi yabitangaje nyuma y’umukino w’Igikombe cy’Intwari wabereye kuri Kigali Pelé Stadium ku wa Kabiri, tariki ya 29 Mutarama 2025, ubwo Police FC yasezereraga Rayon Sports muri ½.
Byiringiro wafashaga cyane ikipe ye ndetse akanabangamira cyane ba myugariro ba Rayon Sports, yavuze ko yateguye uyu mukino bisanzwe, gusa agamije kwerekana ko akiri umukinnyi ukomeye kandi anyotewe gukina n’iy’Ingabo z’Igihugu yavuyemo.
Ati “Ndumva nishimye kuba ntsinze Rayon Sports nk’uko nabyifuzaga. Niyo naba ntameze neza ariko nerekanye urwego rwiza. Uyu ni umukino nateguye bisanzwe nk’uko ntegura Etincelles FC, kuko narinzi ko turi butsinde.”
“Nifuzaga gukina na APR FC kugira ngo nzagire ubunararibonye bwo guhura n’ikipe navuyemo. Ndakeka uzaba ari umukino mwiza, kwisubiza Igikombe [cy’Intwari] ni intego dufite.”
Uyu mukinnyi usatira anyuze mu mpande, yongeyeho ko Rayon Sports FC yashatse kumugura itari izi icyo ishaka kuko yashakaga kugura umunyamakuru kandi we ari umukinnyi.
Ati “Bari bagiye kugura umuntu ukora itangazamakuru ntabwo bari bagiye kugura umukinnyi. Njye nari ngiye kuza muri Rayon Sports nk’umuntu ukora itangazamakuru, Police FC impa amahirwe yo gukina umupira. Ni ibi twerekanye rero.”
Byiringiro yafashije Police FC gutuma Rayon Sports FC ibona ikarita itukura yeretswe umunyezamu Khadim Ndiaye, bituma bayotsa igitutu ndetse inayisezerera kuri penaliti 3-1 nyuma yo kunganya igitego 1-1.
Umukino wa nyuma uzahuza Ikipe ya Polisi y’u Rwanda ndetse na APR FC, uzabera kuri Stade Amahoro, ku wa Gatandatu tariki ya 1 Mutarama 2025, ubwo hazaba hizihizwa Umunsi w’Intwari.
