Police FC yageze ku mukino wa nyuma (Finali) w’Igikombe cy’Intwari isezereye Rayon Sports yatsinze penaliti 3-1, nyuma yo kunganya igitego 1-1 mu minota 90 y’umukino.
Uyu mukino wabaye ku mugoroba wo kuri uyu wa Kabiri tariki ya 28 Mutarama 2025, kuri Kigali Pele Stadium.
Igikombe cy’Intwari mu mupira w’amaguru gitegurwa na FERWAFA ku bufatanye n’Urwego rushinzwe Intwari z’Igihugu, Imidali n’Impeta by’Ishimwe (CHENO), cyitabiriwe n’amakipe ane ya mbere aho Shampiyona iba igeza mu mpera za Mutarama.
Uburyo bwa mbere bw’igitego bwabonetse ku munota wa 10 ku mupira Iraguha Hadji wa Rayon Sports yahaye Rukundo Abdul Rahman, ateye ishoti rikomeye rikurwamo n’Umuzamu Niyongira Patience wahise uhaguruka afata neza.
Ku munota wa 19’ Rayon Sports yafunguye amazamu ku gitego cyatsinzwe na Iraguha Hadji nyuma yo gusohoka nabi k’umunyezamu Niyongira Patience akagera hanze y’urubuga rw’amahina, ahita atsinda mu izamu ryambaye ubusa.
Ku munota wa 29’ Rayon Sports yabonye uburyo bwo gutsinda igitego cya kabiri ku mupira Iraguha Hadji yahaye Rukundo ateye ishoti rikomeye ari mu rubuga rw’amahina, umupira uca imbere y’izamu ujya hanze.
Ku munota wa 30’ Police FC yabonye uburyo bwo kwishyura igitego ku mupira Byiringiro Lague yashatse kuroba Umunyezamu Khadime Ndiaye wari uhagaze imbere, ateye umupira ujya hejuru y’izamu rya Rayon Sports.
Ku munota wa 31’ Rayon Sports yongeye kubona uburyo bwo gutsinda igitego cya kabiri ku mupira Fall Ngagne yahawe ari hagati y’abakinnyi ba Police FC, ateye ishoti rikurwamo na Niyongira ashyize umupira muri koruneri itagize icyo itanga.
Ku munota wa 44’ Rayon Sports yahushije igitego cyabazwe nyuma yaho Fall Ngagne asize Ashraf Mandela, ahinduye umupira usanga Bagayogo wawurengeje Niyongira, ariko ukurirwamo ku murongo na Nsabimana Eric Zidane.
Mbere y’uko igice cya mbere kirangira Umusifuzi wa Kane yongeyeho iminota itanu y’inyongera.
Ku munota wa 45+2 Police FC yabonye igitego cyo kwishyura gitsinzwe na Msanga Henry wateretse umutwe ku mupira wari uvuye muri koruneri yatewe na Allan Katerega, nyuma yo gusumba abakinnyi ba Rayon Sports.
Igice cya mbere cyarangiye amakipe yombi anganyije igitego 1-1.
Mu igice cya kabiri, Rayon Sports yatangiranye impinduka Rukundo Abdul Rahman asimburwa na Azziz Bassane.
Ku munota wa 54 Rayon Sports yabonye uburyo bwo gutsinda igitego cya kabiri ku mupira Adama Bagayogo yinjiye mu rubuga rw’amahina, ateye umupira ashaka Fall Ngagne, uca hagati y’abakinnyi ba Police FC ujya hanze.
Ku munota 70’ Police FC yabonye uburyo bwo gutsinda ku mupira Ishimwe Christian yahinduye mu rubuga rw’amahina, usanga Bigirimana Abeddy ushyizeho umutwe, ujya hejuru y’izamu rya Khadime Ndiaye.
Ku munota 77 Rayon Sports yabonye ikarita itukura yahawe Umunyezamu Khadime Ndiaye kubera gukubita Lague Byiringiro wari umaze kumukinira nabi.
Ku munota wa 79’ Rayon Sports yakoze impinduka, Iraguha Hadji aha umwanya Umunyezamu Ndikuriyo Patient.
Ku munota wa 83’ Police FC yongeye kubona uburyo imbere y’izamu ku mupira Allan Katerega yateye uvuye mu koruneri, usanga Msanga Henry wari ugiye kongera gushyira mu izamu n’umutwe, ku bw’amahirwe make umupira uca hejuru gato y’izamu ririnzwe na Ndikuriyo Patient.
Mbere y’uko umukino urangira Umusifuzi wa Kane yongeyeho iminota irindwi y’inyongera.
İyi minota yihariwe cyane na Police FC yatakaga cyane ishaka igitego cyitsinzi.
Iminota 90 y’umukino n’inyongera yarangiye amakipe yombi anganyije igitego 1-1 hahita hitabazwa za Penaliti ngo hamenyekane ikipe igera ku mukino wa nyuma.
Police FC yatsinze Penaliti 3 mugihe Rayon Sports yatsinze imwe gusa ihita ibona itike yo gukina umukino wa nyuma w’Igikombe cy’Intwari.
Ni ku nshuro ya kabiri yikurikiranya Police FC igeze ku mukino wa nyuma w’Igikombe cy’Intwari yatwaye mu 2024.
Mu mwaka ushize, na bwo yasezereye Rayon Sports iyitsinze kuri penaliti muri 1/2.
Ku mukino wa nyuma izahura na APR FC yasezereye AS Kigali iyitsinze ibitego 2-0 ku wa Gatandatu tariki ya 1 Gashyantare 2025.
Ni inshuro ya kabiri yikurikiranya amakipe agiye guhurira ku mukino w’Igikombe cy’Intwari cyaherukaga mu 2024, icyo gihe Police FC yatsinze APR FC ibitego 2-1.
Umunsi w’Intwari z’Igihugu uzizihizwa ku nshuro ya 31 tariki ya 1 Gashyantare 2025, ufite insanganyamatsiko igira iti “Ubutwari n’Ubumwe bw’Abanyarwanda, inkingi z’iterambere.
