Kuri uyu wa gatanu tariki 31 Mutarama 2025, nibwo isoko ryo kugura no kugurisha abakinnyi hano mu Rwanda rirafunga nkuko byatagajwe na Rwanda Premier League mu kwezi gushize.
Ikipe ya Bugesera FC nayo iri mu makipe yiyubatse muri uku kwezi kwa mbere nyuma yo kubona ko hari imyanya umutoza Haringingo Francis Christian akeneyemo abakinnyi harimo mu kibuga hagati ndetse no mu izamu.
Bugesera FC yasinyishije Eric Ngendahimana amasezerano y’amezi 6 ariko yakitwara neza akongererwa amasezerano ubwo azaba arangiye mu mpera z’iyi sezo. Ngendahimana aje avuye mu ikipe ya AS Kigali ariko kubera kubura umwanya yemera kwerekeza mu Bugesera.
Ngendahimana Eric yakoranye n’umutoza wa Bugesera FC Haringingo Francis, ubwo bari muri Rayon Sports sezo ya 2021-2022 ndetse ni nawe wahesheje iyi kipe igikombe cy’Amahoro iheruka gutwara kuko niwe wari watsinze igitego cyahesheje Rayon Sports igikombe.
Ikipe ya Bugesera FC Kandi yanasinyishije umuzamu Habineza Fils wakiniraga ikipe ya Etoile De L’Est. Amakuru ahari avuga ko uyu mukinnyi yasinye amasezerano y’imyaka 2 ndetse atangwaho Milliyoni 8 z’amafaranga y’u Rwanda.
Habineza Fils yashakwaga n’ikipe ya APR FC ariko nyuma yo kubona ko nta mwanya wo gukina yabona bitewe ni uko iyi kipe ifite abazamu 3 Kandi bakomeye ahita afata umwanzuro wo kwerekeza muri Bugesera FC.
Habineza Fils amaze igihe ahamagarwa mu ikipe y’igihugu y’u Rwanda Amavubi y’abakina imbere mu gihugu ndetse ni na Kapiteni w’ikipe y’igihugu y’u Rwanda Amavubi y’abatarengeje imyaka 20.
Ikipe ya Bugesera FC imikino ibanza ya Shampiyona y’u Rwanda Rwanda Premier League, yasojwe iri ku mwanya wa 10 n’amanota 16.
