Ku nshuro ya mbere Perezida wa Repubulika ya Demokarasi ya Congo yagize icyo avuga kuva ibitero by’inyeshyamba za M23 byafata intera mu minsi ishize mu burasirazuba bw’igihugu, zigafata Umujyi wa Goma.
Perezida wa Tshisekedi yatangaje ko ibyo “bitero ari icyaha ku mateka yacu” kandi ko “igisubizo gikakaye kiri mu nzira.” Muri disikuru njyarugamba yatanzwe mu ijwi rikakaye kandi ryumvikanamo umujinya. Félix Tshisekedi yagaragaye nk’uwiyemeje, mu gihagararo cy’umuyobozi w’intambara.
Félix Tshisekedi yakomoje kandi ku nzira ya diplomasi ati: “Twateye intambwe y’ingenzi. Dushyigikiye inzira y’ibiganiro. ”
Umukuru w’igihugu cya Congo yasabye ko habaho ubukangurambaga rusange. Ati: “Iyi ntambara ni iy’abaturage bose. Mu turere twacu, reka duhuze imbaraga zacu ”. Yatangaje kandi ko hashyizweho gahunda yihutirwa y’ubutabazi anasaba abaturage kugira ubutwari no gukomeza gutuza.
Ku rwego rw’umutekano, yijeje ko hafashwe ingamba. Yagize ati: “Ntabwo twicaye ntacyo dukora.” Yongeyeho ati: “Sisitemu y’umutekano yarashimangiwe.”
Félix Tshisekedi yunamiye kandi abasirikare n’abarwanyi bapfiriye ku rugamba: “Ndashimira ubutwari bw’ingabo zacu, wazalendo yacu, aba abasirikare ba Loni bacu n’abasirikare baguye ku rugamba rw’icyubahiro.”
Perezida wa Congo yongeye gutunga urutoki u Rwanda, yemeza ko hari abasirikare ibihumbi b’u Rwanda ku butaka bwa Congo kandi avuga ko M23 ari “igipupe”. Yamaganye ibyo yise “kurenga ku buryo bukabije ku Masezerano y’Umuryango w’Abibumbye” no “gutesha agaciro indangagaciro rusange”. Ati: “kutagira icyo ukora ni nk’ubufatanyacyaha, tuzarwana.”
Yatangaje kandi ingamba z’ubukungu, cyane cyane amabwiriza yahawe guverinoma yo kugabanya imibereho y’ibigo ndetse anasaba abikorera gushyigikira ingufu z’intambara.
Mu gusoza, yasabye ko urubyiruko rwinjira mu gisirikare ku bwinshi maze asoza agira ati: “RDC ntizaca bugufi. Sinzigera mbatererana. ”
