Neymar Junior yasubiye mu ikipe ya Santos FC yakuriyemo muri Brésil.
Uyu mukinnyi aheruka gusesa amasezerano yari afitanye na Al-Hilal yo muri Arabie Saoudite ku bwumvikane bw’impande zombi, nyuma yo kuyikinira imikino irindwi gusa kubera imvune zamwibasiye kandi yaramuguze miliyoni 77£, mu mpeshyi ya 2023.
Neymar yagize ati “Hashize imyaka 12 mvuye aha ariko wagira ngo ni ejo hashize. Ibyiyumviro byanjye kuri iyi kipe ntabwo byahindutse.”
Biteganyijwe Neymar azerekwa abafana b’iyi kipe isigaye ibarizwa mu Cyiciro cya Kabiri muri Brésil.
Neymar yazamukiye muri Santos FC yatsindiye ibitego 136 mu mikino 225, mbere yo kwerekeza muri FC Barcelona mu 2013.
Mu myaka ine yayikiniye imikino 186, atwara Shampiyona ya Espagne inshuro ebyiri, UEFA Champions League ndetse n’Igikombe cy’Isi cy’Amakipe.
Nyuma yerekeje muri Paris Saint-Germain ku gahigo k’umukinnyi uhenze mu mateka kuko yaguzwe miliyoni 220£ mu 2017.
Ari muri iyi kipe y’i Paris yegukanye ibikombe bya shampiyona y’u Bufaransa bitanu. Neymar yaherukaga gukuraho agahigo ka Pele ko gutsindira Ikipe y’Igihugu ya Brésil ibitego byinshi, aho ubu afite 78.
