Umuryango uharanira uburenganzira bwa muntu wavuze ko byibuze abigaragambyaga 13 bishwe mu myigaragambyo yabereye muri Nigeria yamagana ikibazo cy’ubukungu muri iki gihugu yahindutsemo urugomo muri leta nyinshi.
Abayobozi bemeje ko abantu bane bishwe na bombe ndetse n’ifatwa ry’abantu babarirwa mu magana mu myigaragambyo yatumye hashyirwaho amasaha yo gutaha muri leta nyinshi.
Umuyobozi wa Amnesty International muri Nigeria, Isa Sanusi, mu kiganiro yavuze ko yagenzuye mu bwigenge impfu zavuzwe n’abatangabuhamya, imiryango y’abahohotewe n’abavoka.
Polisi yo muri Nigeria yavuze ko abigaragambyaga barenga 300 batawe muri yombi ndetse n’amasaha yo gutaha yashyizweho muri leta za Kano na Katsina nyuma yo gusahura leta n’umutungo rusange. Umupolisi umwe na we yapfuye abandi benshi barakomereka.
Iyi myigaragambyo yari ishingiye cyane ku ibura ry’ibiribwa n’imiyoborere mibi mu gihugu. Abayobozi ba Leta ya Nigeria, bakunze gushinjwa ruswa, bari mu bahembwa neza muri Afurika, itandukaniro rikomeye mu gihugu gifite bamwe mu baturage bakennye cyane kandi bafite inzara ku Isi, nubwo ari kimwe mu bya mbere bifite peteroli nyinshi ku mugabane wa Afurika.
Abari mu myigaragambyo bitwaje ibyapa, inzogera n’ibendera ry’icyatsi kibisi n’umweru rya Nigeria, baririmbaga bamagana ubuyobozi mu gihe bashyize ku rutonde ibyo basaba, birimo no kugarura nkunganire kuri gaz n’amashanyarazi byakuweho mu rwego rw’amavugurura ya guverinoma ivuga ko agamije kuzamura ubukungu yagize ingaruka mbi ku biciro ku bindi bicuruzwa hafi ya byose.
