Dr Frank Habineza, Umuyobozi w’ishyaka Green Party, yatangaje ko ishyaka ryafashe icyemezo cyo guhinduranya abadepite bituma Maombi Carine wari ku rutonde rw’abagomba kurahira asimbuzwa Masozera Icyizanye bakurikiranaga ku rutonde rwemejwe na Komisiyo y’Igihugu y’Amatora, NEC.
Komisiyo y’Igihugu y’Amatora yo yavuze ko ibyakozwe byemewe n’amategeko kandi ko icyo yakoze ari ukumenyesha Inteko Ishinga Amategeko bityo uwemejwe n’ishyaka akaba ari we urahira.
Itangazo rya Green Party ryo kuri uyu wa Gatatu tariki 14 Kanama 2024 ntirigaragaza impamvu y’iri hinduranywa ry’abadepite.
Icyizanye Masozera wasimbuye Maombi Carine yari asanzwe ari umubitsi w’ishyaka Democratic Green Party.
Umuryango RPF Inkotanyi na wo ejo ku wa Kabiri tariki 13 Kanama 2024 wasabye NEC ko Musonera Germain wari mu badepite bagomba kurahira uyu munsi asimburwa na Jean Claude Mazimpaka.
