Patriots BBC yatsinzwe na REG BBC amanota 86-83, uba umukino wa mbere itsinzwe muri Shampiyona ya Basketball 2024.
Uyu mukino wabaye ku mugoroba wo ku Cyumweru tariki 18 Kanama 2024 muri Lcyee de Kigali.
Amakipe yombi yaherukaga kwitwara neza mikino iheruka Patriots yatsinze APR BBC amanota 77-70, mu gihe REG BBC yatsinze Espoir BBC amanota 93-71.
REG BBC yatangiye neza umukino ibifashijwemo na Muhoza Jean de Dieu na Cleveland Thomas Jr batsinda amanota menshi.
Bidatinze agace ka mbere karangiye iyi kipe iyoboye umukino n’amanota 27 kuri 20 ya Patriots.
Mu gace kabiri, Ikipe ya Sosiyete y’Igihugu Ishinzwe Ingufu yakomeje gukina neza ari na ko yongeyera amanonota ibifashijwemo n’abarimo Muhizi Prince na Mukama Victor.
Iyi kipe yongereye ikinyuranyo kigera mu manota 15 (45-30) ubwo haburaga iminota ibiri n’igice ngo aka gace karangire.
Igice cya mbere cyarangiye REG BBC iyoboye umukino n’amanota 50 kuri 34 ya Patriots BBC.
Mu gace ka gatatu, Patriots yatangiye kugabanya ikinyuranyo ibifashijwemo na Stephaun Branch na William Perry.
Aka gace karangiye REG ikiyoboye umukino n’amanota 67 kuri 61 ya Patriots.
Agace ka nyuma kari injyanamuntu amakipe yombi atsindana cyane. Mu minota itanu yako ikinyuranyo cyari amanota 10 (75-65).
Muri iyi minota, Cleveland watsindaga amanota menshi cyane yafashaga REG BBC kwizera intsinzi. Mu minota ibiri ya nyuma, Patriots yashatse kugaruka ariko biranga.
Umukino warangiye, REG BBC yatsinze Patriots BBC amanota 86-83 iba ikipe ya mbere iyitsinze muri Shampiyona y’uyu mwaka.
Umukino wa nyuma muri Shampiyona y’uyu mwaka uzahuza Patriots BBC na UGB ku wa Gatanu, tariki 23 Kanama 2024 mbere y’uko hatangira imikino ya kamparampka “ Playoffs” muri Nzeri uyu mwaka.
