Mu Buyapani ingendo z’indege 36 zarasubitswe izindi 201 zigizwa inyuma, nyuma y’uko imikasi yari mu iduka ryo ku kibuga cy’indege cya Chitose iburiwe irengero.
Byabaye mu mpera z’icyumweru gishize. Ni nyuma y’uko iduka rikorera kuri iki kibuga cy’indege kiri mu gace ka Hokkaido, ritangaje ko hari imikasi yabuze.
Abashinzwe umutekano bahize bongera batangiza ibikorwa byo gusaka kugira ngo hatagira uyinjiza mu ndege agamije kugirira abandi nabi. Ibi bikorwa byo gusaka byamaze amasaha abiri ariko birangira imikasi iburiwe irengero.
Nubwo abashinzwe umutekano batigeze babona iyi mikasi, bafashe icyemezo ko ingendo zikomeza, gusa hari hamaze gusubikwa izigera kuri 36 izindi 201 zigijwe inyuma.
Bukeye bwaho, ku Cyumweru tariki 18 Kanama 2024, iyi mikasi yasanzwe mu iduka nanone. Yabonywe n’umukozi wo muri iri duka.
