Imikino ya UEFA Champions League ivuguruye yatangiye gukinwa, Bayern Munich yanyagiye Dinamo Zagreb ibitego 9-2 mu gihe Liverpool yatsindiye AC Milan mu Butaliyani ibitego 3-1.
Ku mugoroba wo ku wa Kabiri tariki 17 Nzeri 2024 ni bwo iyi mikino yatangiye mu bihugu bitandukanye.
Mu Butayali ku kibuga Stadio Giuseppe Meazza, AC Milan yari yakiriye Liverpool yo mu Bwongereza mu mukino wari utengerejwe n’abakunzi ba Ruhago.
Muri uyu mukino AC Milan yatangiranye imbaraga maze ku munota wa gatatu Christian Pulisic anyeganyeza inshundura.
Liverpool yishyuye iki gitego ku munota wa 23, kuri coup-franc yatewe na Trent Alexander-Arnol, Ibrahima Konaté atsindisha umutwe umupira ujya mu rushundura.
Mbere y’uko igice cya mbere kirangira, Virgil van Dijk, yatsinze igitego cya kabiri muri uyu mukino bajya kuruhuka Liverpool iyoboye ku bitego 2-1.
Mu gice cya kabiri Liverpool yabonye ikindi gitego ku munota wa 68 cyatsinzwe na Dominik Szoboszlai.
Umukino warangiye Liverpool itsinze AC Milan ibitego 3-1 ikura amanota atatu mu Butaliyani.
İndi mikino yabaye uyu munsi Juventus yatsinze PSV Eindhoven ibitego 3-1. Ibitego bya Juventus byatsinzwe na Kenan Yıldız, Weston McKennie na Nicolás González mu gihe icy’impozamarira cyashyizwemo na Ismael Saibari ku munota wa nyuma.
Aston Villa yo mu Bwongereza yatsindiye Young Boys iwayo ibitego 3-0 bya Youri Tielemans, Jacob Ramsey na Amadou Onana, ihita ishimangira umwanya wa kabiri kuri uyu munsi.
Bayern Munich yatangiye itanga isomo inanyagira GNK Dinamo Zagreb ibitego 9-2 mu mukino Harry Kane yinjijemo bine, akanandikiramo amateka yo kuba Umwongereza winjije byinshi mu marushanwa y’i Burayi, aho akurikiye Wayne Rooney ufite 30.
Muri uyu mukino Harry Kane yabaye umukinyi wa mbere muri UEFA Champions League utsinze ibitego bitatu kuri penaliti mu mukino umwe.
Mu bihugu cya Espagne, Real Madrid ifite igikombe giheruka cy’uyu mwaka yatangiye neza itsinda VfB Stuttgart yo mu Budage ibitego 3-1 byatsinzwe na Kylian Mbappé, Antonio Rüdiger na Endrick Felipe watsinze mu minota ya nyuma y’umukino.
Undi mukino Sporting CP yo muri Portugal yatsinze LOSC Lille ibitego 2-0 mu mukino Angel Gomes yabonye ikarita y’umutuku.
