Rayon Sports WFC yegukanye Igikombe cya ’Super Cup’ inyagiye AS Kigali ibitego 5-2, mu mukino wabaye kuri uyu wa Kane tariki ya 26 Nzeri 2024.
Wari umukino ukomeye cyane kuko aya makipe yombi yaherukaga guhurira ku wa nyuma w’Igikombe cy’Amahoro, warangiye Rayon Sports WFC icyegukanye.
Rayon Sports WFC yatangiye umukino isatira izamu rya As Kigali.
Ku munota wa 10, Rayon Sports yafunguye amazamu ku gitego cyatsinzwe na Mary Chavinda Gibi ku mupira muremure bateye, Kapiteni Nibagwire Sifa Grolia ananirwa kuwukuraho usanga ari wenyine ashyira umupira mu rushundura.
Nyuma yo gustindwa igitego, AS Kigali yatangiye kwinjira mu mukino ari na ko isatira izamu rya Rayon Sports.
Ku munota wa 25 , AS Kigali yabonye igitego cyo kwishyura cyatsinzwe na Iradukunda Callixte.
AS Kigali yabonye igitego cya kabiri cyatsinzwe na Nguema Odette myugariro Mukantaganira Joselyne yahushije.
Igice cya mbere cyarangiye AS Kigali WFC itsinze Rayon Sports WFC ibitego 2-1.
Mu gice cya kabiri, Rayon Sports WFC yagarukanye imbaraga itangira gusatira ishaka igitego cyo kwishyura.
Ku munota wa 66, Rayon Sports yatsinze igitego cyo kwishyura cyatsinzwe na Marry Gibi Chavinda ku mupira wahinduwe na Mukeshimana Dorotheé atsindisha umutwe.
Rayon Sports WFC yakomeje kwiharira umukino maze ku munota wa 84 itsinda igitego cya gatatu cyatsinzwe na Rachael Muema Otolo.
Rayon Sports yarushaga cyane AS Kigali yatsinze igitego cya kane cyatsinzwe na Khadidja Muhawenimana.
Mbere y’uko umukino urangira Umusifuzi wa Kane yongeyeho iminota itandatu y’inyongera.
Ku munota wa 94, Rayon Sports yatsinze igitego cya gatanu cyatsinzwe na Jeaninne Mukandayisenga uzwi nka “KaBoy”.
Umukino warangiye Rayon Sports WFC inyagiye AS Kigali WFC ibitego 5-2, yegukana ’Super Cup’.
Ikipe ya Gikundiro yahembwe imidali na miliyoni 5 z’amafaranga y’u Rwanda, mu gihe AS Kigali WFC yahawe miliyoni 3 z’amafaranga y’u Rwanda.
Biteganyijwe ko shampiyona y’uyu mwaka izatangira tariki 5 Ukwakira 2024.
