Police FC yanyangiye Kiyovu Sports ibitego 4-0 mu mukino w’ikirarane w’umunsi wa kabiri wa shampiyona utarabereye igihe, ikomeza kuyobora urutonde rwa shampiyona rw’agateganyo n’amanota icumi.
Uyu mukino wabaye kuri uyu wa Kane tariki ya 26 Nzeri 2024, kuri Kigali Pele Stadium.
Police FC yatangiye umukino iri hejuru cyane isatira izamu rya Kiyovu Sports.
Ku munota wa 12, Police FC yafunguye ku gitego cyatsinzwe na Ishimwe Christian ku mupira yateye inyuma yurubuga rw’amahina umuzamu Nzeyurwanda Djihad asanga wageze mu rushundura.
Ku munota wa 33, Kiyovu Sports yabonye amahirwe yo kwishyura igitego ku ishoti ryatewe na Tuyisenge Hakim, rifatwa neza n’umuzamu Niyongira Patience.
Ku munota wa 34, Police FC yatsinze igitego cya kabiri cyatsinzwe na Bigirimana Abedi ku mupira mwiza yahawe na Ishimwe Christian.
Mu gice cya kabiri, Police FC yakomeje gusatira izamu rya Kiyovu Sports maze ku munota wa 50 itsinda igitego cya gatatu cyatsinzwe na Mugisha Didier ku ishoti yateye nko muri metero 25 umuzamu ntiyabashaka gukuramo umupira.
Police FC yakomeje gusatira izamu rya Kiyovu Sports maze ku munota wa 84 itsinda igitego cya kane cyatsinzwe na Rutahizamu Ani Elijah nyuma yo gucenga ba myugariro ba Kiyovu Sports ahita aroba umuzamu Nzeyurwanda Djihad.
Umukino warangiye Police FC inyangiye Kiyovu Sports ibitego 4-0 ikomeza kuyobora shampiyona n’amanota icumi.
Kiyovu Sports yagumye ku mwanya wa 13 n’amanota 3 mu mikino itatu imaze gukina.
Police FC izagaruka mu kibuga ku Cyumweru tariki 29 Nzeri 2024, mu mukino w’umunsi wa gatanu wa shampiyona izakirwamo na Vision FC mu gihe Kiyovu Sports izakira Amagaju FC.
