U Rwanda rwabaye igihugu cya gatanu cyakiriye imikino y’Akarere ka Kane mu mikino ya Golf, rukaba rwiteguye kubyaza umusaruro amahirwe mu kurumenyekanisha mu mahanga.
Ni irushanwa riteganyijwe kuba kuva ku wa Gatanu, tariki ya 4 kugeza ku ya 6 Ukwakira 2024, rikazitabirwa n’ibihugu bitandatu aribyo Uganda, Kenya, Mauritius, Ethiopia, Seychelles n’u Rwanda rwakiriye.
Abakinnyi bose bazakinira ku kibuga mpuzamahanga cya Kigali Golf Resorts & Villas, aho bagomba gukinira mu myobo 18 ikigize.
Umuyobozi Mukuru w’Inama y’Ubutegetsi ya Rwanda Ultimate Golf Course, Alain Girinshuti, yahaye ikaze ibihugu bizitabira anavuga ko kwakira amarushanwa nk’aya biri mu byatumye ikibuga cyubakwa.
Ati “Uyu munsi ntabwo twishimira kwakira irushanwa gusa, ahubwo turanataha inzu nshya yakirirwamo abaza gukinira hano. Iki gikorwa kandi kirerekana aho twifuza kugera mu mukino wa Golf, haba mu kibuga n’ishoramari.”
Perezida w’Ishyirahamwe ry’Umukino wa Golf mu Rwanda, Amb. George William Kayonga, yunze mu rye avuga ko bazabyaza amahirwe babonye mu kumurikira andi mahanga, ubukerarugendo bw’u Rwanda bushingiye kuri Golf.
Ati “Iri rushanwa rizaba ritambuka imbonankubone kuri televiziyo zitandukanye cyane cyane mu bihugu byitabiriye. Hari abazabona ubwiza bw’iki kibuga bagire amatsiko yo kuza mu Rwanda kandi ni cyo cyubakiwe.”
Perezida w’Impuzamashyirahamwe ya Golf muri Afurika, Johnson Omollo, yavuze ko u Rwanda rwagaragaje ko rushoboye akaba ariyo mpamvu bemeye ko uyu mwaka rwakira.
Ati “Umwaka ushize ni bwo twemereye u Rwanda ko rushobora kwakira iyi mikino kuko rwatugaragarije ko rushobora gutegura kandi rufite n’ikibuga cyiza. Si kuri Afurika y’Iburasirazuba ahubwo na Afurika yose nta rushanwa ritahabera.”
Buri gihugu cyitabaje abakinnyi bane, akaba aribo bazahatana, abitwaye neza bakazahemberwa mu nzu nshya ya Kigali Golf Resort & Villas.
