Umugaba Mukuru w’Ingabo za Uganda, Gen Muhoozi Kainerugaba, yateguje ibihano abayobozi ba Leta Zunze Ubumwe za Amerika mu gihe iki gihugu cyaba gikomeje guhana abanyafurika.
Yabitangarije ku rubuga rwe rwa X akunze kunyuzaho ubutumwa butavugwaho rumwe.
Yagize ati: “Afurika ntabwo yigeze ifatira ibihano abayobozi ba Amerika bagize uruhare mu bwicanyi bukabije bwakorewe abayobozi bacu nka Patrice Lumumba (yahoze ari Minisitiri w’Intebe wa Congo). Nibakomeza guhana abanyafurika, natwe tuzabahana.”
Uyu musirikare isanzwe ari umuhungu wa Perezida Yoweri Kaguta Museveni, ubutumwa bwe buteguza Amerika buje bukurikira ubwo yanditse ku rubuga rwe rwa X asaba Ambasaderi w’iki gihugu i Kampala gusaba imbabazi Museveni bitaba ibyo akirukanwa muri Uganda.
Byari nyuma yo gushinja uriya mudipolomate kubahuka Perezida wa Uganda ndetse no gutesha agaciro itegekonshinga ry’iki gihugu.
Kugeza ubu ntiharamenyekana impamvu Muhoozi akomeje guhangara Amerika, gusa amakuru avuga ko Ambasaderi William Popp aherutse kwandikira Perezida Museveni amusaba kutaziyamamaza mu matora y’Umukuru w’Igihugu ateganyijwe muri 2026.
Gen Muhoozi kandi yareze uyu mudipolomate gukorana n’abantu ndetse n’imiryango irwanya Leta ya Uganda.
Igitutu cye kuri Amerika kirakurikira ibihano iki gihugu giherutse gufatira abapolisi bane ba Uganda kibarega guhonyora uburenganzira bw’ikiremwa muntu.
