Leta Zunze Ubumwe za Amerika zatangaje ko zigiye guha Israel inkunga z’ibikoresho bya gisirikare bikoreshwa mu bwirinzi bukumira za misile zishobora guterwa kuri iki gihugu cyo mu Burasirazuba bwo Hagati ndetse n’abasirikare bo kubikoresha.
Minisiteri y’Ingabo ya Amerika (Pentagon) yatangaje ku wa 13 Ukuboza 2024 ko ibyo bikoresho ari ibizwi nka ‘The Terminal High Altitude Area Defense (THAAD).
Ni ibikorwa Washington igiye gukora mu gihe Iran iherutse kugaba ibitero kuri Israel mu minsi ishize, hirindwa ko Tehran yakongera kubigaba bikaba byakwangiriza byinshi.
Umuvugizi wa Pentagon Maj. Gen. Pat Ryder, yavuze ko iyoherezwa rya THAAD ryemejwe na Minisitiri w’Ingabo, Lloyd Austin abibwirijwe na Perezida Biden.
Yemeje ko ubwo bufasha buje mu kongerera ubushobozi Israel by’umwihariko ingabo zayo zirwanira mu kirere mu kurinda ko igihugu cyagabwaho ibisasu bisa nk’ibiherutse kukigabwaho.
Ati “Bigaragaza uburyo Amerika irajwe ishinga no kurinda Israel n’Abanyamerika babayo kugira ngo batagirwaho ingaruka n’ibisasu Iran ishobora kongera kugaba.”
Nubwo ikomeje ibikorwa byo guhashya Hezbollah muri Liban kuva mu kwezi gushize, bivugwa ko Israel iri gutegura gusubiza Iran yayigabyeho igitero ku wa 01 Ukwakira 2024.
Ntabwo biramenyekana neza igihe ubwo bufasha buzagera muri Israel.
Umwaka ushize Amerika na bwo yigeze kohereza bene ibyo bikoresho nyuma y’ibitero bya Hamas.
THAAD ni ubwirinzi bwuzuzanya n’ubwa Patriot busanzwe bukoreshwa, bukagira akarusho ko kuba bwarinda ahantu hagari kurusha Patriot, bukaba bwasenya ibisasu biri mu ntera iri hagati y’ibilometero 150 na 200.
