Ingabo z’Umuryango w’Abibumbye ziri mu butumwa bwo kugarura amahoro muri Liban, Unifil, zatangaje ko zititeguye kuva mu birindiro byazo nk’uko byari byasabwe na Minisitiri w’Intebe wa Israel, Benjamin Netanyahu.
Izi ngabo ziri muri Liban mu bikorwa byo kugarura amahoro muri icyo gihugu, icyakora Israel ikavuga ko umutwe wa Hezbollah ukoresha ibirindiro byazo cyangwa ibiri hafi yazo, mu kurasa kuri Israel no kuyigabaho ibitero mu ntambara ihuje impande zombi.
Kubera izo mpamvu, Israel yasabye izi ngabo kuva muri ibyo birindiro kuko Israel iteganya kuhakorera ibikorwa bya gisirikare bigamije guca intege umutwe wa Hezbollah, icyakora izi ngabo zamaze kugaragaza ko zititeguye kuva muri ako gace.
Umuyobozi wazo, Jean-Pierre Lacroix, yavuze ko ibihugu bifite izo ngabo byamaze kwemera ko ziguma mu birindiro byazo, ari nako byagenze ku Kanama k’Umutekano k’Umuryango w’Abibumbye.
Ntibizwi neza niba Israel iri bufate icyemezo cyo guhangana n’izo ngabo mu rwego rwo kuzikura mu birindiro byazo, cyangwa se niba iri bwemere ko zihaguma, igakomeza urugamba rwayo mu bundi buryo.
