Amerika yasabye ko Israel itanga agahenge mu ntambara irimo muri Gaza, kugira ngo abaturage babashe kugerwaho n’ibiribwa ndetse n’ubuvuzi bw’ibanze ndetse ko n’itabikora izahagarika inkunga y’intwaro n’ibindi bikorwa byo kuyifasha muri iyi ntambara.
Ikinyamakuru cyo muri Amerika, Axios, gitangaza ko Israel yasabwe gutanga agahenge kugira ngo imfashanyo ibashe kugera ku baturage bari mu Ntara ya Gaza muri Palestine.
Umunyamabanga wa Leta Zunze Ubumwe za Amerika ushinzwe Ububanyi n’Amahanga, Antony Blinken, na Minisitiri w’Ingabo Lloyd Austin, nibo bandikiye abayobozi ba Israel babasaba gutanga aka agahenge.
Ubutumwa bugira buti “Tubandikiye kugira ngo tubamenyeshe ko Guverinoma ya Amerika ihangayikishijwe n’ibibera muri Gaza. Dukeneye ko muhagarika vuba intambara bitarenze uku kwezi k’Ukwakira hakaboneka agahenge, bitagenze gutyo bizatuma hari politike ya Amerika ku bijanye n’iyi ntambara ihinduka”.
Muri iyo baruwa kandi Amerika yasabye Israel kureka amakamyo 350 arimo imfashanyo akinjira muri Gaza kugira ngo zigere ku baturage no kureka kwimura abasivile mu gihe nta bikorwa bya Gisirikare ihabona.
Nubwo ariko Israel yasabwe aka gahenge, ibiro bya Perezida wa Amerika, White House, ntacyo byatangaje niba Prezida Joe Biden ari mu barishyizeko umukono kuri iyo baruwa.
Ibiro ntaramakuru by’Abongereza, Reuters byatangaje ko iyo baruwa yahawe umuyobozi w’ingabo muri Israel Yoav Gallant, ndetse n’ikinyamakuru News 12 cyo muri Israel cyemeje aya makuru y’uko Amerika yasabye agahenge kuri iyi ntambara.
Reuters, ivuga ko kuva intambara ya Hamas na Israel yatangira, ari ubwa mbere Amerika isabye iki gihugu gutanga agahenge abaturage bavanywe mu byabo n’intambara bagahabwa imfashanyo.
Reuters ivuga ko mu misi iri imbere, Amerika ishobora guhindura umuvuno mu bijanye no gushyigikira Israel mu ntambara irimo n’umutwe wa Hamas. Amerika iha Israel imfashanyo za gisirikare zibarirwa mu mamiliyari y’amadolari.
