Rodrigo Hernández Cascante (Rodri) ukina mu kibuga hagati yugarira mu Ikipe y’Igihugu ya Espgane na Manchester City yo mu Bwongereza, yegukanye Ballon d’Or ya 2024 nyuma yo gutorwa nk’umukinnyi mwiza wahize abandi muri uyu mwaka.
Uyu muhango wo gutanga ku nshuro ya 68 ibihembo bya France Football wabereye muri Théâtre du Châtelet i Paris ku mugoroba wo ku wa Mbere tariki 28 Ukwakira 2024.
Ibi birori ntibyitabiriwe n’ikipe ya Real Madrid nyuma y’aho imenyeye ko Vinicius Junior wayo adahabwa iki gihembo.
Rodri w’imyaka 28, yegukanye iki gihembo ku nshuro ya nshuro ya mbere mu birori biryoheye amaso byari biyobowe na Didier Drogba ari kumwe n’Umunyamakurukazi Sandy Heribert.
Iki gihembo yagihawe nyuma yo gufasha Ikipe y’Igihugu ya Espgane kwegukana igikombe cy’u Burayi uyu mwaka batsinze u Bwongereza ibitego 2-1 ndetse aba umukinnyi mwiza w’irushanwa.
Rodri kandi yafashije Manchester City kwegukana igikombe cya shampiyona y’u Bwongereza “English Premier League” ku nshuro ya kane yikurikiranya.
Muri uyu mwaka kandi Rodri yegukanye UEFA Super Cup n’igikombe cy’Isi cy’Amakipe.
Ku nshuro ya kabiri yikurikiranya, Umukinnyi watwaye Ballon d’Or mu bagore yabaye Umunya-Espagne Aitana Bonmatí w’imyaka 26 akaba asanzwe akinira FC Barcelone yatwaye shampiyona na UEFA Champions League.
Real Madrid yabaye ikipe y’umwaka mu bagabo nyuma yo kwegukana UEFA Champions League ku nshuro ya 14 mu mateka mu gihe FC Barcelona y’Abagore yongeye kuba ikipe y’umwaka.
Umukinnyi ukiri muto yabaye Umunya-Espagne Lamine Yamal ukinira FC Barcelona mu bihembo bya Ballon d’Or 2024 cyiswe ‘Kopa Trophy’.
Mu bindi bihembo byatanzwe, rutahizamu w’umwaka yabaye Harry Kane ukinira Bayern Munchen yo mu Budage na Kylian Mbappé wa Real Madrid bahembwe igihembo kizwi nka Gerd Müller gihabwa uwatsinze ibitego byinshi, aho bombi batsinze ibitego 52 mu marushanwa yose.
Umunyezamu mwiza yongeye kuba Umunya-Argentine Emiliano Martinez wa Aston Villa yo mu Bwongereza mu gihe Umunya-Espagne, Jennifer Hermoso ukinira Tigres Femenil yo muri Mexique yegukanye ‘Socrates Trophy’ igihembo gihabwa uwakoze ibikorwa byiza.
Carlo Ancelotti utoza Real Madrid yagizwe Umutoza mwiza w’umwaka [Johan Cruyff Award] mu bagabo mu gihe Emma Hayes utoza Ikipe y’Abagore ya Leta Zunze Ubumwe z’Amerika yahembwe nk’umutoza mwiza mu cyiciro cy’abagore.
Ballon d’Or ya 2024 yari ifite umwihariko, bwa mbere kuva mu 2003 iki gihembo kitarimo Lionel Messi ufite iki gihembo inshuro umunani (2009, 2010, 2011, 2012, 2015, 2019,2021 na 2023) na Cristiano Ronaldo ugifite inshuro eshanu.
Nyuma yo kwegukana iyi Ballon d’or Rodri yavuze ko yifuje kuba yahagarika umupira w’amaguru igihe yari akiri mu myaka yo hasi gusa umuryango we ukamuba hafi, yashimiye buri wese wagize uruhare mu gutuma agera ku nzozi ze.
Ati: “Mfite benshi bo gushimira harimo UEFA, France Football, umuryango, abo dukinana n’abakunzi banjye, abantoye n’abandi bose. Nkiri umwana nagiraga inzozi zo kugera ku rwego rwo hejuru. Ndashimira Manchester City kuko iyo bataba bo ntabwo mba ndi aha.”
Rodri yabaye Umukinnyi wa kabiri wa Premier League wegukanye iki gihembo nyuma ya Cristiano Ronaldo mu 2008, yabaye kandi Umunya – Espagne wa kabiri wegukanye Ballon d’Or nyuma ya Luis Suarez mu 1960.
