Perezida wa Leta Zunze Ubumwe za Amerika, Joe Biden, kuri uyu wa Kane ushize mu ijambo rye ryerekeye amatora yo ku itariki 5 Ugushyingo 2024, yemeye ko Donald Trump yatsinze kandi ko azakora ihererekanyabubasha mu mahoro .
Ni ijambo ryari rigufi ariko ribumbatiye ingingo atahwemye kuvugaho mu gihe cyose amaze ku butegetsi bwa Amerika.
Yatangaje ko yemera ibyavuye mu matora, ko yahamagaye Donald Trump wayatsinze amushimira, ndetse akanashimira Visi Perezida Kamala Harris ku mwete, ubwitange no kutizigama yagize mu gihe cyo kwiyamamaza.
Perezida Biden yagize ati: “Kwiyamamaza n’uguhiganwa. Ni ibyerekezo bitandukanye bihiganwa, igihugu kigahitamo kimwe cyangwa ikindi. Twemeye ibyo iki gihugu cyahisemo. Navuze kenshi ko udakwiriye gukunda igihugu cyawe aruko watsinze gusa. Ko udakwiriye gukunda umuturanyi wawe aruko mwemeranya. Ni ibintu dukwiriye gukora hatitawe ku watowe uwo ari we wese. Ntiturebana nk’abanzi, ahubwo turarebana nk’abanyamerika.”
Perezida wa Amerika ucyuye igihe yashimiye cyane inzego zateguye amatora harimo n’abakorerabushaka bakoze kubw’umurimo ukomeye bakoze. Yavuze ko ikibazo cyo kwemera ukuri n’imikorere y’inzego zishinzwe amatora muri Amerika gikwiriye kujya ku ruhande yemeza ko zakoze mu kuri, mu kutabogama no mu bwisanzure kandizikwiriye kwizerwa.
