Umugore witwa Stella Namwanje yahamijwe n’urukiko rw’i Masaka muri Uganda icyaha cyo kugaburira umwanda we umwana yareraga, urukiko rukaba rwamuhanishije igifungo cy’imyaka 35.
Uyu mugore yari asanzwe atuye mu gace kazwi nka Nyendo Mukungwe, yafashwe nyuma y’uko hagaragaye amashusho amugaragaza ari kujugunya umwanda we ku ruhinja yareraga rufite amezi 10.
Ubushinjacyaha bwari buyobowe na George Kalinaki, bwabwiye urukiko ko hari amashusho yatangajwe tariki ya 04 Ugushyingo 2024; aya mashusho akaba agaragaza Namwanje agaburira umwana w’inshuti ye umwanda wo mu bwiherero.
Iperereza kandi ryerekanye ko umwana yareraga bamusanganye ibikomere ku jisho birimo gukira, icyemeza ko yari asanzwe atotezwa n’uwamureraga watawe muri yombi ashinjwa no kumugaburira amazirantoki.
Ubushinjacyaha bwahishuye ko Stella Namwanje wo mu kigero cy’imyaka 34 yanasanzwemo ubwandu bw’agakoko ka virusi itera SIDA, ibishobora gushyira umwana mu kaga atabonye ubuvuzi bwihuse.
Ubushinjacyaha bwamusabiye igifungo cya burundu bushingiye ku miterere y’icyaha Namwanje yakoreye umwana muto w’inzirakarengane. Uru rwego kandi rukomeza ruvuga ko igihano nk’iki cyatuma abantu bumva ko nta mwana ukwiriye guhohoterwa.
Nyuma y’uko abaturanyi be bagejeje ikirego ku buyobozi agahita atabwa muri yombi, yemeye ibyo ashinjwa ndetse anasaba imbabazi avuga ko atazi icyamuteye gukora ibidasanzwe. Ni mu gihe umwunganizi we mu mategeko yasabye urukiko guha imbabazi umukiriya we kuko yemera icyaha kandi bikaba n’inshuro ya mbere aburana mu rukiko.
Umucamanza witwa Aloysius Natwijuka yanzuye ko ibikorwa Stella Namwanje yakoze bigayitse cyane bityo ko adakwiye imbabazi na gato, ahubwo akatirwa igifungo cy’imyaka 35 kuko atigeze arushya urukiko.
