Abakinnyi barenga 200 bari mu byiciro bitandukanye, abasore abagabo n’abakuze bategerejwe kwitabira irusha rya Golf (CIMEGOLF 2024), igiye gukinwa ku nshuro ya Gatandatu, ku wa 30 Ugushyingo 2024.
Ubwo yari mu kiganiro n’itangazamakuru gitegura iri rushanwa rikinwa kuva mu 2017 cyabaye kuri uyu wa Kabiri, Kapiteni wungirije wa Kigali Golf Club, Eugene Murenjekha, yavuze ko CIMEGOLF umusaruro wayo ugaragara ndetse ko kuri iyi nshuro izitabirwa n’umubare munini.
Ati “Tumaze kugira abantu barenga 200 ubu, bigaragaza uruhare rwa CIMEGOLF mu iterambere ry’umukino (Golf). Abakinnyi benshi bifuza gukina iri rushanwa kuko rituma hari amahirwe babona cyane cyane binyuze mu bihembo bahabwa.”
Iri rushanwa riterwa inkunga na CIMERWA n’abandi bafatanyabikorwa batandukanye, umuyobozi wayo Mangesh Verma Kumar, avuga ko gahunda bafite ari ukuzamura urwego rwaryo rikaba irushanwa rikomeye kandi rikarushaho kugirira akamaro abarikina n’abarikurikira.
Muri uyu mwaka wa 2024 abakinnyi bose bazatangirira rimwe kubera igikorwa cy’umuganda rusange giteganyijwe mu gihugu hose, ku munsi w’irushanwa ari wo wa Gatandatu wa nyuma w’ukwezi.
Bwa mbere mu 2017 CIMEGOLF ikinwa yitabiriwe n’abakinnyi 90, ifite ingengo y’imari ya miliyoni 30Frw. Mu 2018 yitabirwa n’abasaga 100, ikoresha miliyoni 53Frw mu gihe kuri ubu zimaze kurenga miliyoni 100Frw zishorwamo.
