Tyson Fury wanditse amateka akomeye cyane mu mukino w’iteramakofe, yatangaje ko yahagaritse kuwukina.
Muri Gashyantare 2024, uyu mugabo yavuze ko agiye kurwana nk’aho aribwo agitangira, asaba abamusaba guhagarika gukina gusubiza amerwe mu isaho.
Muri Gicurasi no mu Ukuboza 2024, yahise akina imirwano ikomeye cyane yamuhuje na Oleksandr Usyk, gusa yose arayitsindwa, ananirwa kwegukana umukandara w’indwanyi y’akataraboneka.
Mu butumwa yanyujije ku mbuga nkoranyambaga ze yagize ati “Nishimiye gutangaza ko nahagaritse gukina umukino w’iteramakofe, byari bikomeye cyane, nashimishijwe na buri munota nagiriyemo.”
Mu magambo ye yo gusezera kandi yavuze ko yari agikenewe, ashimangira ko agiye adashimishije abakunzi be.
Si ubwa mbere Fury ahagaritse gukina kuko muri Mata 2022, yatangaje uyu mwanzuro ariko nyuma y’amezi atandatu gusa yongera kwisubiraho.
Hari hashize iminsi mike mugenzi we, Anthony Joshua agaragaje ko yifuza ko bazahurira mu mirwano.
Fury yabaye umukinnyi wa mbere ku Isi inshuro ebyiri, yegukana imikandara ya (World Boxing Association-WBA), (International Boxing Federation-IBF), (World Boxing Organization-WBO), (International Boxing Organization-IBO) na (World Boxing Council-WBC).
