Umutoza w’ikipe ya Manchester City, Pep Guardiola yatandukanye n’uwari umugore we Cristina Serra bari bamaranye imyaka 30 bakundana bakaba bari bamaze no kubyarana abana batatu.
Nk’uko byatangajwe n’ibinyamakuru bitandukanye byo muri Espagne aba bombi bafashe umwanya wo gutandukana burundu mu kwezi kwa 12 k’umwaka ushize wa 2024.
Ni nyuma y’uko bari amaze imyaka 5 baba mu bihugu bitandukanye dore ko muri 2019 Cristina Serra yafashe umwanzuro wo kujya kuba muri Espagne agasiga Pep Guardiola mu Bwongereza.
Yajyanye n’umwe mu bana babo witwa Valentina aho yari agiye kwita kuri kompanyi yabo y’imideri bafite muri iki gihugu. Aba bombi batangiye gukundana mu 1994 aho bahise banabana gusa muri 2014 ni bwo bakoze ubukwe bwabereye mu gace kari impande y’i Barcelona.
Bafitanye abana batatu, Cristina Serra ukomoka muri Brazil akaba asanzwe ari umunyamakuru ndetse n’umwanditsi yagiye agaragara cyane ari kumwe na Pep Guardiola nk’aho muri 2023 yari Instanbul ari gushimira umugabo we wari umaze gutwara igikombe cya UEFA Champions League atsinze Inter Milan ku mukino wa nyuma.
Uyu mutoza yagiye akunda kugaragara byinshi kuri uyu mugore we cyane mu biganiro n’itangazamakuru nk’aho muri 2024 yigeze kuvuga ko ari mwiza ku Isi mu bijyanye n’imyambarire.
Yagize ati: “Umugore wanjye ni mwiza ku Isi mu bintu byinshi, cyane cyane imyambarire. Mu busanzwe arambwira ngo ntukambare ibi cyangwa ngo wambare ibyo nkamwumvira. Ndi umunyabwenge bihagije kugira ngo menye igihe abantu ari beza kundusha ngo nkurikize inama zabo”.
