Umuraperi Sean ‘Diddy’ Combs wamamaye nka P.Diddy, ibyaha aregwa bikomeje kwiyongera ni nyuma yaho hagaragaye umugore mushya umushinja ko yamusambanyije ku gahato afite imyaka 16 y’amavuko, akanabikora yabanje kumusindisha.
Mu kirego yatanze, uyu mugore wahawe izina rya Jane Doe ku mpamvu z’umutekano we, yavuze ko yahuye na Diddy mu 2000 afite imyaka 16 y’amavuko ari na bwo yamufashe ku ngufu.
Yavuze ko yahuye n’uyu muraperi mu gace ka Manhattan ubwo yari avuye mu kazi yakoraga ko kurera abana. Iki gihe ngo Diddy yari ari mu modoka hamwe n’abandi bagabo babiri bameze nk’abakozi be bamuha ‘lift’ kubera igitutu cya Diddy arayemera, ariko atungurwa no kubona batamujyanye iwabo ahubwo bamujyanye mu rugo rwe.
Mu mpapuro z’iki kirego zabonywe na TMZ, uyu mugore yagaragaje ko ubwo Diddy yamugezaga iwe yabanje kumuha inzoga nyinshi, amaze gusinda ku buryo atabasha gutabaza, abona kumusambanya.
Mu mpamvu yavuze ko zatumye adahita atanga ikirego guhohoterwa, harimo kuba yari agifite ubwoba bw’ibyamubaho kuko Diddy yamuhamirije ko nagira uwo abibwira bizamukoraho.
