Umuyobozi w’Ikigo cy’Igihugu gishinzwe Amazi, Isuku n’Isukura (WASAC) Omar Munyaneza yemereye Abadepite bagize Komisiyo y’Imiyoborere, Uburinganire n’Ubwuzuzanye bw’Abagabo n’Abagore mu Nteko Ishinga Amategeko ko hashyizweho ingamba zizatuma iki kigo kitongera kuza mu myanya ya mbere mu byaka ruswa abaturage kugira ngo babahe serivise.
Ibi yabivuze ubwo yatangaga ibisobanuro ku kibazo cy’abaturage batarahabwa ingurane kandi baranyurijwe umiyoboro y’amazi mu butaka bwabo ndetse no kuba iki kigo kivugwamo ruswa muri serivise iha abaturage.
Umuyobozi w’Ikigo cy’Igihugu gishinzwe Amazi, Isuku n’Isukura (WASAC) yasobanuye ko hari ibyatangiye gukorwa ngo icyuho cya ruswa ivugwa muri iki kigo icike burundu.
Ati “ Hari uburyo bushya turimo gushyiraho abakiriya bazajya basabiramo amazi bitwa ‘New Connection’ ku bantu bashaka kugeza amazi bushya mu ngo zabo ndetse n’abasaba ‘Mubazi’ irenze imwe ku muntu ufite inzu nyinshi bashyiriweho uburyo bwo kujya babisaba bari mu rugo aho kujya ku mashami ya WASAC mu rwego rwo kubarinda guhura n’abakozi bayo bashobora kubaka ruswa.
Munyaneza avuga ko ubu buryo bwiswe ‘New Connection’ buzafasha abayobozi ba WASAC kujya bamenya igihe umuntu yasabye Mubazi, igihe yasabiye, impamvu atayihawe n’uwamutindije kuyihabwa, akavuga ko hazabaho imikorere myiza nitangira gukoreshwa kuko bizaba bigenzurwa n’ikoranabuhanga.
Ati “ Ndumva nihabaho kugabanya uburyo umukiriya ahura n’abakozi bacu bizagabanya ruswa ivugwa muri WASAC rwose”.
Ubundi buryo bwashyizweho na WASAC buzagabanya icyuho cya ruswa ni ubwiswe ‘Smart meters’, ikaba ari Mubazi ifite ikoranabuhanga izajya ituma abakozi ba WASAC babasha kubona uburyo amazi yakoreshejwe hatabayeho ko binjira mu rugo rw’umuturage.
Ati “ Ahubwo twebwe tunyuze ku muhanda muri metero 100 cyangwa 500 aho iyo Mubazi yawe iri tukabasha kubona bya bipimo biyiriho noneho tukabasha kubona bwa butumwa bugufi bukwereka amafaranga urimo cyangwa wajya kuri Website ya WASAC ugashyiramo nomero ya Mubazi yawe ukabasha kuba wabona amafanga urimo”.
Munyaneza avuga ko ubu bari mu bukangurambaga bwo gushishikariza abakiriya babo gutanga imyirondoro bakabihuza na nomero za Mubazi hanyuma yamara kubarirwa amafaranga arimo WASAC umukiriya azajya ahita ahabwa ubutumwa bugufi kuri terefone ye hatabayeho kujya mu rugo iwe.
Ubundi buryo barimo bakora ni ubwitwa ‘SCADA software’ buzafasha WASAC kubona niba mu muyoboro w’Amazi hari aho yacitse guhita babasha kubibona.
Ati “ Kwakundi abaturage baduhamagaraga batubwira ngo umuyoboro wacitse mudufashe twe tuzajya duhita tubibona ako kanya twoherezeyo umukozi wacu ahite abikora kugira ngo abaturage batabura serivise”.
Mu bushakashatsi bwakozwe na Transparency International Rwanda hamwe n’urwego rw’umuvunyi kuri ruswa n’akarengane ikigo cya WASAC cyaje mu bigo byagaragaye ko byatse ruswa abaturage.
Munyaneza avuga ko mubyo bagaragarijwe ari uko igihe umuntu abagannye agiye kwaka Mubazi nshya, n’igihe umukozi wa WASAC ahamagawe ngo ajye kugira aho asana hangiritse akaba yakwaka amafaranga y’urugendo uwo agiye gufasha.
Indi ngamba yafashwe n’ikigo WASAC cyo guca ruswa n’akarengane nuko basabye Minisiteri y’Abakozi ba Leta n’Umurimo (MIFOTRA) kubashyirira mu itegeko rigenga umukozi wabo ko igihe yagaragayeho ibikorwa byo kwaka ruswa ahita yirukanwa mu ma saha 48 nta nteguza ibayeho.
Ati “ Ubu byamaze gushyirwa mu itegeko rigenga abakozi bacu kandi nabo barabizi. Ikindi nuko natwe ayo mafaranga y’urugendo tuyabaha ubu ugiye gusana ahantu ntagomba gusaba itike uwo agiye gufasha”.
Munyaneza avuga ko izi ngamba zose zashyizweho zitaratangira gushyirwa mu bikorwa uretse iyo gusaba Mubazi irimo gukora izindi zikazashyirwa mu bikorwa mu ngengo y’imari y’uyu mwaka naho uburyo bwiswe ‘SCADA software’ buzafata igihe kuko bikiri mu ngigo.
Ati “Ubu buryo twakoresheje twajyanye n’abakozi bacu mu itorero kwigishwa kugira indangagaciro na Kirazira ndetse ko bagomba kwimakaza ubutore mu kazi kabo tukaba twizeye ko ibi byose bizatuma tutongera kuboneka ku rutonde rw’ibigo byaka ruswa”.
