Ishami ry’Umuryango w’Abibumbye ryita ku buzima (OMS), ryatangaje ko mu ntara ya Kagera muri Tanzania hagaragaye icyorezo cy’indwara ya Marburg, ndetse ko abantu umunani mu icyenda bacyanduye bamaze guhitanwa na cyo.
Ku wa Mbere tariki ya 13 Mutarama ni bwo OMS yahishuye ko muri Tanzania hari kiriya cyorezo, mu butumwa yanyujije ku rubuga rwayo ruzwi nka Event Information Site (EIS) ikunze kwifashisha iburira ibihugu biba byugarijwe n’ibibazo by’ubuzima.
Iri shami rya Loni mu itangazo ryasohoye, ryagaragaje impungenge z’uko kiriya cyorezo cyica abantu ku kigero cya 89% gikomeje gufata indi ntera.
Riti: “Kugeza ubu tumaze kumenya abantu icyenda banduye, barimo umunani bapfuye. Twakwitega ubundi bwandu mu minsi iri imbere, uko igenzura ry’iyi ndwara rizagenda ryiyongera.”
Indwara ya Marburg iri mu zica abantu ku muvuduko wo hejuru, kuva mu 1967 ubwo yagaragaraga bwa mbere ku Isi.
Kuva icyo gihe ababarirwa muri 700 bagiye bayandura, biganjemo abo muri Angola aho iki cyorezo cyahitanye abantu 329 hagati ya 2004 na 2005.
Iki cyorezo ahanini cyandurira mu gukora ku matembabuzi y’ukirwaye no gusangira na we ibikoresho byiganjemo imyambaro, cyagaragaye muri Tanzania nyuma y’iminsi mike u Rwanda rugitsinze.
Mu kwezi gushize k’Ukuboza ni bwo Minisiteri y’Ubuzima yemeje ko u Rwanda rwatsinze burundu iki cyorezo cyari kimaze amezi hafi atatu kigaragaye mu Rwanda.
