Rutahizamu Cristiano Ronaldo ari mu nzira zo kongera amasezerano mu ikipe ya Al Nassr amwemerera ibirimo no kubona imigabane ingana na 5% muri iyi kipe.
Imyaka ibiri irashize uyu mukinnyi afashe umwanzuro wo gusesa amasezerano na Manchester United agahitamo kwerekeza muri Al Nassr.
Mu mpeshyi y’umwaka utaha amasezerano y’imyaka 2 n’igice yasinye muri iyi kipe ni bwo azaba arangiye. Nk’uko ibinyamakuru bitandukanye birimo Marca bibyandika, Cristiano ari mu biganiro n’iyi kipe byo kuba yakongera amasezerano y’umwaka umwe.
Ubusanzwe Cristiano Ronaldo muri iyi kipe ahembwa agera kuri miliyoni 164 z’Amapawundi ku mwaka nk’amafaranga yo mu kibuga ariko akanabona andi agera kuri miliyoni 49 z’Amapawundi akura mu bindi bikorwa byo hanze y’ikibuga birimo kugaragara mu bindi bikorwa byabereye muri Arabia Saudite ndetse kuba ambasaderi w’iki gihugu mu mupira w’amaguru.
