Minisitiri w’Ubuzima, Dr. Sabin Nsanzimana, yatangaje ko bitarenze muri Kamena 2025, Ibitaro bya Kaminuza bya Kigali (CHUK) byamaze kwimurirwa i Masaka mu Karere ka Kicukiro.
Ni ingingo yagarutseho kuri uyu wa Kane tariki 16 Mutarama 2025, ubwo yagezaga kuri Sena gahunda y’ishyirwa mu bikorwa rya Politiki y’Ubuzima n’ibikorwa mu guteza imbere amavuriro y’ibanze.
Mu 2013 ni bwo hatangajwe umushinga wo kwimura ibitaro bya CHUK, bigakurwa mu mujyi rwagati. Ni icyemezo cyafashwe nyuma yo kubona ko mu gice cyubatsemo ibi bitaro hari kugenda hazamo umubyigano utewe n’ibikorwa bishya bihavuka birimo iby’ubucuruzi.
Minisitiri w’Ubuzima Dr. Sabin Nsanzimana yabwiye Abasenateri ko habura amezi make ngo uyu mushinga ushyirwe mu bikorwa, ibikorwa bya CHUK byimurirwe i Masaka.
Ati “Harabura amezi make, duteganya ko muri Kamena cyangwa muri Kanama byose bizaba byarangiye, ibitaro bikaba byakwimuka […] CHUK rero inyubako zigeze kure, turateganya ko mu mezi make zizaba zarangiye ndetse Igikorwa cyo kwimuka kigatangira.”
“Ntabwo ari ukwimuka bihutiyeho kuko kwimura ibitaro, kwimura serivisi ni ibintu bigomba gutegurwa abaturage bakabimenya, ibyuma bigashyirwamo, ibikoresho bigashyirwamo mu buryo butuma serivisi zidahagarara.”
Yakomeje avuga ko aho CHUK iri uyu munsi “hari serivisi z’ubuzima tuzakomeza kuhatangira.”
Ati “Hariya CHUK yari iri na ho turateganya kuzakomeza kuhakoresha kuri serivisi zikenewe zishobora guhurizwa hamwe bitewe n’ibindi bitaro biri hafi hariya yaba ibya Muhima ndetse n’ibya Nyarugenge, hari serivisi wasangaga abaturage bazikenera baramaze kuba benshi. Ibyo birateganyijwe hari amatsinda ari kubitegura neza kugira ngo barangiza kubaka n’ibyo byose bihita bikurikiraho.”
Dr. Nsanzimana yavuze ko agace ka Masaka kazimurirwamo CHUK kahariwe serivisi z’ubuvuzi, ku buryo kazakurura ubukerarugendo bushingiye ku buvuzi.
Ati “Aho izimukira hari ibindi bikorwa by’ubuzima bihari, hari n’ibindi bizahaza, navuga nka IRCAD nayo ihamaze iminsi ndetse na za laboratwari zigiye kuhubakwa.”
Biteganyijwe ko ibitaro bya CHUK bizakorera mu byahoze ari ibitaro bya Masaka, cyane ko kugeza mu Ugushyingo 2024, imirimo yo kubivugurura yari igeze kuri 80%.
Ibi bitaro bizuzura bitwaye miliyari 85 Frw, angana n’Ama-Yuan miliyoni 580.
Nibyuzura bizaba bifite ubushobozi bwo kwakira abarwayi 827, ni ukuvuga ibitanda abarwayi bashobora kuryamaho. CHUK ubu yakiraga abarwayi bagera kuri 400.
