Ubutegetsi bwa Perezida Donald Trump bwirukanye ku kazi Admiral Linda Fagan, umugore wa mbere mu buyobozi bw’igisirikare cya Leta Zunze Ubumwe za Amerika wari ukuriye ingabo zirinda imipaka y’igihugu.
Ministeri y’umutekano muri Amerika ifite mu nshingano kurinda imipaka y’igihugu, ntiyahise isubiza ubusabe bwo kugira icyo ivuga ku kwirukanwa kwe ku kazi.
Televiziyo Fox News yo muri Amerika yatangaje ko umwe mu bategetsi bakuru yavuze ko mu mpamvu zatumye yirukanwa ku kazi harimo kunanirwa gukumira ibyugarije umutekano w’imbibe z’igihugu ahubwo akibanda birenze ku kutavangura, uburinganire, no guha bose amahirwe. Indi mpamvu yaba ari iyoyoka ry’ikizere yari afitiwe ku birebana n’iperereza ku bibazo by’ihohotera rishingiye ku gitsina.
Trump n’abandi barepubulikani bamaze igihe kinini banenga gahunda za Leta zibanda ku guha amahirwe amoko yose y’abatuye Amerika. Umutekano w’umupaka w’Amerika ni ingingo y’ingenzi kuri Perezida Trump watangaje ibihe bidasanzwe ku mupaka w’Amerika na Mexico, ku munsi wa mbere muri iyi manda ye.
Mu butumwa ministri w’agateganyo w’umutekano, Benjamine Huffman, yagejeje ku ishami ry’ ingabo zirinda imbibe z’imipaka y’Amerika ribarirwa muri atanu agize igisirikare cya leta zunze ubumwe z’Amerika, yagize ati: ‘Yamaze muri aka kazi igihe kirekire kandi kizibukwa, ndamushimira umurimo yakoreye igihugu cyacu’.
Fagan yayoboye ingabo zirinda imipaka y’Amerika kuva mu 2022 nyuma yo kuba umugaba wungirije ubuyobozi bukuru bw’uru rwego nk’uko iyi nkuru dukesha Ijwi rya Amerika ivuga.
Umwirondoro we, wamaze gukurwa ku rubuga rw’igisirikare kirinda imipaka ya Amerika uvuga ko ‘yakoze ku migabane irindwi yose igize isi uhereye mu birwa bya Ross muri Antarctica.
